Mat deem wat vun der nach zum Deel ganz jonker Lëtzebuerger Handball-Nationalekipp gewise gouf, kucke gestane Spiller awer optimistesch an d'Zukunft.

5 Matcher an 9 Deeg, dat nennt ee volle Programm, an dat war lo de Pensum vun der Lëtzebuerger Hären-Handballnationalekipp. Fir d'éischt war et de Mini-Tournoi an der Weltmeeschterschaftsqualifikatioun op de Färöer Inselen, an duerno den Allers a Retourmatch an der Europameeschterschaftsqualifikatioun géint d'Belsch. Um Enn ass et néierens duergaangen, fir an déi nächst Phas vun der Qualifikatioun ze kommen.

FLH - Bilan / E Reportage vum Fränky Hippert

No der Victoire géint d'Färöer Inselen, dem Remis géint Lettland, an der onglécklecher Defaite op ee Gol géint Italien, huet der FLH-Formatioun um Enn effektiv just ee klenge Gol gefeelt, fir weider ze kommen. Dat war an der WM-Qualifikatioun. 4 Deeg drop huet een dunn an der Europameeschterschaftsqualifikatioun am Allersmatch besonnesch an enger Phas vun der Partie géint d'Belsch, eng besser Ausgangspositioun verspillt.

Den Nationalspiller Dan Scheid: Natierlech war eng Qualifikatioun méiglech. Mir hunn de Match bei eis zu Lëtzebuerg vun der 45. Minutt un, wou mer net méi richteg dru gegleeft hunn a wou si en Ecart vun 6 Goler erausgeholl hunn, aus der Hand ginn.

Déi 6 Goler hunn et am Retourmatch dunn och ganz schwéier gemaach. Zu Hasselt huet een awer op d'mannst e Remis erausgeschloen. D'Lëtzebuerger Nationalspiller wéi de Ben Weyer wëssen och, datt d'Belsch de Roude Léiwen elo net wierklech spilleresch iwwerleeë waren.

Ben Weyer: Si haten um Enn einfach méi Konditioun, méi Reserven an de Been. Natierlech wär eppes méiglech gewiescht. Mir kënnen et awer positiv mathuelen.

No deene 5 intensive Matcher an 9 Deeg war ee bei der FLH-Formatioun souwuel physesch wéi och mental platt.

De Lëtzebuerger Nationaltrainer Nikola MalesevicDat eent ass mat deem anere verbonnen. Da kommen direkt Ballverloschter, d'Konzentratioun fält direkt. Et war net méi wéi nach am Match géint d'Färöer Inselen.

Mat deem wat vun der nach zum Deel ganz jonker Lëtzebuerger Ekipp gewise gouf, kucke gestane Spiller optimistesch an d'Zukunft. Eng Zukunft an där een awer bei der FLH elo déi nächst Schrëtt muss goen, fir an der Entwécklung vun hirem Sport weider ze kommen. Eng Zukunft awer och ouni déi zwee Routiniere Martin Müller an de Golkipp Chris Auger, déi elo e Schlussstréch ënnert hir Karriär an der Nationalekipp gezunn hunn.

Verbesserungsméiglechkeeten am Lëtzebuerger Handball

FLH WM- an EM-Bilan a Verbesserungen / Rep. Franky Hippert

Den FLH-Nationaltrainer Nikola Malesevic huet och e puer Punkten ugeschwat, déi an Zukunft am Lëtzebuerger Handball kéinten oder misste verbessert ginn. Wann ee wëll hei am Land weiderkommen, da kann ee sech dat eent oder anert vun de Färöer Inselen ofkucken, seet den Nikola Malesevic. Vun de Färöer Inselen kann ee soe wat ee wëll. Wéi ech bei hinnen an d'Hal komm sinn, hunn ech gekuckt, d'U10 hu scho 4 Mol d'Woch Training. Vun der U13 un ass en Trainer do, e Co-Trainer, e Preparateur Physique e Videoanalyst a mir schwätzen hei vu Veräiner.

En Dadda vum President vun der Handballfederatioun, dem Dokter Romain Schockmel ass jo, méi Professionalismus an de Lëtzebuerger Sport ze kréien. Den FLH-Nationaltrainer géif dat begréissen, weess awer, datt och nach aner Saache kéinte verbessert ginn.

Professionalismus jo, op där aner Säit d'Quantéit vun den Trainingen an der Woch eropschrauwen, mä do hu mer bestëmmt de Problem mat der Aarbecht. Et sinn och nach vill aner Saachen, wéi d'Formatioun vun de Jonken, d'Formatioun vun den Trainer.

Bei der europäescher Handballfederatioun muss ee sech awer och Froe stellen. Dann huet eng Nationalekipp wéi Lëtzebuerg 5 Matcher an 9 Deeg, an elo ass deen nächsten offiziellen Optrëtt vun der FLH-Formatioun an enger offizieller Kompetitioun fir den Ufank vum nächste Joer programméiert.