Am Grupp C koum et um Dënschdeg de Moien eiser Zäit zum Duell tëscht Argentinien a Saudi-Arabien, an dat mat engem onerwaarte Resultat.

Och am zweete Match gouf et méi en iwwerraschend Resultat, do gouf et am Grupp D nämlech nëmmen en 0:0 tëscht Dänemark an Tunesien. Mam nämmlechte Resultat goung d'Partie tëscht Mexiko a Polen op en Enn. En Dënschdeg den Owend huet Frankräich dunn nach mat 4:1 géint Australien gewonnen. Dobäi huet de Giroud de Rekord vum Thierry Henry mat 51 Goler egaléiert.

Resumé WM / Reportage Gilles Tricca

Grupp C

Argentinien - Saudi-Arabien 1:2
1:0 Messi per Eelefmeter, 1:1 Al-Shehri (48'), 1:2 Al-Dawsari (53')

Et ass denkbar schlecht lassgaange fir Saudi-Arabien, well schonn an der 10. Minutt huet de Lionel Messi en 11-Meter verwandelt, nodeems de Paredes gefoult gi war. De Foul u sech gouf awer eréischt vum VAR gemellt. An der 22. Minutt huet de Messi den 2:0 markéiert, war awer en Tick ze fréi gestart an et gouf op Abseits decidéiert. An der 27. Minutt hunn d'Argentinier schonn den 2:0 vum Martinez gefeiert. Ma och hei koum de VAR an den Asaz, an deen huet eng Abseitspositioun erkannt. D'selwecht nach emol an der 35. Minutt, wou et nees de Martinez war, dee getraff huet... ma alt erëm aus enger Abseitspositioun.

D'Saudien hunn d'Argentinier an der 48. Minutt äiskal erwëscht a konnten duerch den Al-Shehri den 1:1 markéieren. Ma domat net genuch. D'Argentinier hate keng Zäit sech ze erblosen, well an der 53. Minutt huet den Al-Dawsari no enger wonnerbarer Eenzelaktioun den 1:2 geschoss. Deemno gëtt et um 3. Dag op der WM déi éischt fatzeg Iwwerraschung. Ee vun den Titel-Favoritte start mat enger Néierlag an der Gruppephas a muss elo schonn zidderen, nach weiderzekommen.

RTL

Mexiko - Polen 0:0

An der éischter Hallschent huet eigentlech nëmmen eng eenzeg Ekipp gespillt an dat war Mexiko. Polen war immens zeréckhalend an huet sech gréisstendeels op d'Defense konzentréiert. Mexiko huet de Match gemaach, ass awer seele richteg geféierlech gewiescht, deemno goufen d'Säite gedréint, ouni datt ee Gol gefall ass.

Nom Säitewiessel gouf et du relativ fréi e Schock fir déi dominant Mexikaner. No engem Foul vum Hector Moreno um Robert Lewandowski gouf et en Eelefmeter fir d'Polen. De polnesche Star-Stiermer vum FC Barcelona ass selwer ugetrueden, ma den Ochoa am Gol vun de Mexikaner konnt staark paréieren. An der Suite ass d'Partie ofgeflaacht an och wann d'Mexikaner duebel esou dacks op de Gol geschoss hu wéi d'Polen, sollt de Match mat engem onspektakulären 0:0 op en Enn goen.

Grupp D

Dänemark - Tunesien 0:0

Och am zweete Match en Dënschdeg hat et de Favorit nees schwéier. D'Däne konnten nämlech frou sinn, datt si an der Paus net schonns hanne waren. Net nëmmen haten d'Tunesier déi besser Chancen, mee si waren den Europäer reegelrecht iwwerleeën. Donieft hu si och e Gol geschoss, deen allerdéngs wéinst enger Abseitspositioun net gezielt huet.

Och an der zweeter Hallschent haten d'Tunesier de bessere Start erwëscht. Eréischt an de leschten 30 Minutte vum Match sinn d'Däne besser an de Match komm an haten dunn och deels ganz gutt Chancen. Déi bescht gouf et an der 70. Minutt, wéi Dänemark just de Potto getraff huet.

Frankräich - Australien 4:1
0:1 Goodwin (9'), 1:1 Rabiot (27'), 2:1 Giroud (32'), 3:1 Mbappé (68'), 4:1 Giroud (71')

Australien ass iwwerraschend offensiv an de Match géint den amtéierende Weltmeeschter gaangen an konnt dann an der 9. Minutt no enger flotter Offensivaktioun duerch de Goodwin a Féierung goen. D'Fransousen hu sech dovunner awer net aus der Rou brénge gelooss a si konnten duerch e Kappball vum Rabiot an der 27. Minutt ausgläichen. Nëmme 5 Minutte méi spéit konnt de Giroud mat sengem 50. Lännermatch-Gol op 2:1 stellen.

Och no der Paus waren d'Fransousen déi besser Ekipp an an der 68. Minutt konnt den Mbappé mam Kapp op 3:1 erhéijen. Nëmmen 3 Minutte méi spéit war et dunn op en Neits de Giroud, dee fir de 4:1 gesuergt huet. Mat sengem 51. Gol fir Frankräich ass de 36 Joer ale Buteur elo gläich gezu mam Thierry Henry. Domat wënnt Frankräich fir den Optakt vun dëser WM an d'Fransouse sinn dann och den éischten Titelverdeedeger, deem dat geléngt zanter Brasilien 2006.