E Méindeg hunn an der 1. Aachtelsfinall Kroatien a Japan géintenee gespillt. Um Owend gouf et d'Partie tëschent Brasilien a Südkorea.

De Vizeweltmeeschter Kroatien konnt sech am éischten Eelefmeterschéisse vum Turnéier géint Japan duerchsetzen a réckelt domat weider an d'Véierelsfinall.

Do trëfft Kroatien op de Rekordweltmeeschter Brasilien, dee géint Südkorea kuerze Prozess gemaach a sech kloer mat 4:1 duerchgesat huet.

De Resumé vun de Matcher

Japan - Kroatien 1:1 (1:3 no Eelefmeterschéissen)
1:0 Maeda (43'),1:1 Perisic (55')

D'Japaner hu géint de Vizeweltmeeschter couragéiert lassgeluecht. Schonn no 3 Minutten ass eng Flank vum Wataru Endo op de Shogo Taniguchi gaangen, dee sech géint de Josko Gvardiol duerchsetze konnt an de Ball nëmme knapp iwwert déi kroatesch Këscht gekäppt huet. Am weidere Verlaf vun der 1. Hallschent konnte béid Ekippen ofwiesselend den Drock openeen erhéijen, d'Defensen hunn allerdéngs op deenen zwou Säite wéineg zougelooss, ier du kuerz virun der Paus d'"Samurai Blue" ëmmer méi geféierlech gi sinn a sech an der 43. Minutt mat engem Gol vum Daizen Maeda beloune konnten.

Wärend déi 2. Hallschent mat vill hin an hier lassgaangen ass, awer keng Ekipp sou richteg geféierlech konnt ginn, koum an der 55. Minutt wéi aus dem Näischt den Ausgläich fir d'Kroaten: Eng Flank vum Dejan Lovren konnt den Ivan Perisic aus gutt 13 Meter an den ënneschte rietsen Eck käppen. D'Japaner hu sech heivunner awer net beandrocke gelooss an nëmmen 2 Minutten duerno misst den Dominik Livakovic e Schoss vum Endo aus 22 Meter iwwert d'Lat lenken. Am weidere Spillverlaf konnten d'Kroaten ënnert dem Zlatko Dalic de Match kontrolléieren, besonnesch vill ass allerdéngs vu kenger Ekipp méi komm, sou dass et an déi éischt Verlängerung vum Tournoi gaangen ass.

Bis op e kräftege Schoss aus 20 Meter vum Kaoru Mitoma an der 105. Minutt, deen de Livakovic paréiere konnt, ass an dëser awer och nëmme wéineg geschitt. D'Kroaten hunn Drock gemaach, mä géint d'Japaner gouf et keen Duerchkommen. D'Decisioun huet also missen am Eelefmeterschéisse falen, wou d'Kroate sech no 3 staarke Parade vum Livakovic duerchsetze konnten.

Brasilien - Südkorea 4:1
1:0 Vinícius Júnior (7'), 2:0 Neymar (13', Eelefmeter), 3:0 Richarlison (29'), 4:0 Paquetá (36'), 4:1 Paik (76')

Beim Rekordweltmeeschter Brasilien stoung de Neymar no senger Blessur nees vun Ufank un um Terrain. An der animéierter Ufanksphas huet Brasilien déi éischt Chance genotzt, fir a Féierung ze goen. No enger flotter Kombinatioun iwwer riets huet de Raphinha de Ball flaach an d'Mëtt vum Strofraum gepasst. De Vinicius Junior stoung eleng um zweete Potto an huet de Ball an de laangen Eck geschoss. Kuerz drop huet de franséischen Arbitter Turpin no engem Feeler vum Jung op de Richarlison op de Punkt gewisen. De Neymar huet d'Féierung fir de Favorit verduebelt. Südkorea huet an der Suite probéiert, dogéint ze halen an hat an der 17. Minutt duerch e Wäitschoss vum Hwang d'Chance, fir de Réckstand ze verkierzen. Den Alisson huet de Ball mat enger flotter Parad ofgewiert.

D'Confiance war awer op der Säit vun de Brasilianer a si hu konsequent no vir gespillt. D'Ofwier vun de Südkoreaner war mam séiere Spill vum Rekordweltmeeschter iwwerfuerdert. An der 29. Minutt huet de Richarlison mam 3. Gol schonns fir d'Virentscheedung gesuergt. Den Aussesäiter war elo komplett vum Rullo a virun der Paus sollt och nach de véierte Gol falen. No enger Flank vum Vinicius huet de Paqueta d'Féierung weider ausgebaut. Mam batteren 0:4 aus Siicht vu Südkorea sinn d'Säite gewiesselt ginn.

Direkt no der Paus hat de Son déi grouss Méiglechkeet op den Éieregol, mee den Alisson huet op e Neits gutt reagéiert. Brasilien huet den Tempo aus der Partie erausgeholl a sech just nach sporadesch Chancen erausgespillt. An der 60. Minutt ass de Raphinha mat sengem Schoss um Golkipp hänke bliwwen. Südkorea huet awer net opginn an hat weider Geleeënheeten op e Gol. De Schoss vum Hwang aus kuerzer Distanz huet nees den Alisson gehalen. Eng Véierelsstonn viru Schluss huet de Paik awer de verdéngten 1:4 fir Südkorea markéiert. Et war de leschte Gol an enger Partie, an där den Erfolleg vu Brasilien ni a Gefor war. An der Véierelsfinall geet et fir d'Seleção géint den aktuelle Vizeweltmeeschter Kroatien.

KO-Phas