D'Karateka Jenny Warling huet sech virun de Feierdeeg um Training um Kräizband blesséiert.

Mëttlerweil ass d'Karateka vum KC Walfer operéiert ginn a schafft zesumme mam LIHPS (Luxembourg Institute for High Performance in Sports) um Comeback. Den "Return to Sports"-Programm soll do déi néideg Moyene ginn, fir esou séier wéi méiglech nees a Form ze kommen. Eent vun den Objektiver vum Jenny Warling senger Saison ass et, bei den Europaspiller dobäi ze sinn. Déi si vum 21. Juni bis den 2. Juli zu Krakau a Polen.

Opgrond vun der Blessur gëtt dat awer elo knapp. En plus leeft d'Qualifikatioun fir dës Spiller schonn. E weidert Zil am Jenny Warling sengem Kalenner ass d'Weltmeeschterschaft am Oktober zu Budapest an Ungarn. Bis dohinner misst d'COSL-Elite-Athletin nees fit sinn.