D'Spuenier konnten dobäi och de véierte Match an dëser Campagne gewannen, wougéint England sech souverän géint Tschechien duerchgesat huet an d'Schwäiz an der Liga B weider ouni Punkteverloscht bleift. Fir d'Lëtzebuerger gouf et dogéint eng 0:2-Defaite géint Bulgarien.
Spuenien setzt säi perfekte Laf fort. A Kroatien huet de Weltmeeschter sech mat 2:1 duerchgesat. Dëst obwuel d'Haushären duerch den Ivan Perišić a Féierung gaange waren. No der Paus huet de Perišić awer Rout gesinn an d'Spuenier konnten hir Iwwerzuel ausnotzen. De Mikel Merino huet mat zwee Goler de Match gedréint, woubäi den decisive Gol eréischt an der 89. Minutt gefall ass. Mat véier Victoirë steet Spuenien bei zwielef Punkten an huet den Ticket fir d'Véierelsfinalle schonns sécher.
Och England huet seng staark Form confirméiert. Géint Tschechien hunn d'Three Lions kloer mat 3:0 gewonnen. En Eegegol vum Coufal huet England a Féierung bruecht, ier den Harry Kane mat zwee weidere Goler fir d'Decisioun gesuergt huet. Fir den englesche Kapitän war et op sengem 125. Lännermatch den 90. an 91. Gol am Nationaltricot. England steet domadder bei néng Punkten an ass domadder direkt hannert Spuenien.
An der Liga B bleift d'Schwäiz weider ongeschloen am Grupp 1. D'Eidgenossen hunn Nordmazedonien mat 3:0 geklappt an domadder och hire véierte Match gewonnen. De Rieder an de Manzambi hunn d'Schwäizer séier a Féierung bruecht, ier an der Schlussphas nach en drëtte Gol gefall ass. Mat zwielef Punkte steet d'Schwäiz souverän un der Tabellespëtzt.
Fir Schottland ass den Owend dogéint enttäuschend verlaf. D'Schotten waren duerch de Ryan Christie zwar mat 1:0 géint Slowenien a Féierung gaangen, mä d'Gäscht hunn de Match no der Paus duerch Goler vum Matko a Sturm gedréint a sech um Enn mat 2:1 behaapt. Slowenien setzt sech domadder mat siwe Punkten op der zweeter Plaz fest.
San Marino stoung an der Liga C kuerz virun enger grousser Iwwerraschung. Géint Albanien louchen d'Gäscht zwar fréi duerch e Gol vum Asllani zeréck, konnten duerch de Lazzari awer an der 66. Minutt ausgläichen an domadder hiren éischte Gol an dëser Nations-League-Campagne markéieren. Um Enn huet Albanien sech awer nach mat 2:1 duerchgesat, wouduerch d'Albaner mat néng Punkten elo d'Féierung am Grupp 1 iwwerholl hunn.
Am selwechte Grupp huet Wäissrussland iwwerraschend mat 1:0 géint Finnland gewonnen. De Shumanskiy hat schonns an der éischter Minutt getraff an dëse Gol sollt bis zum Schluss och deen eenzege Gol an dësem Match bleiwen. Finnland a Wäissrussland stinn domadder allebéid bei siwe Punkten op der zweeter Plaz, direkt hannert Albanien.
An der Grupp 3 huet d'Slowakei hir Ambitioune fir d'Gruppevictoire ënnerstrach. Beim 4:0 a Moldawien hunn de Strelec an de Suslov schonn an der éischter Hallschent fir kloer Verhältnisser gesuergt, ier den Hancko an den Haraslín no der Paus nogeluecht hunn. D'Slowakei läit domadder mat zéng Punkte kloer un der Spëtzt.
Den éischte Match vum Dag tëscht Kasachstan an de Färöer Inselen ass iwwerdeems mat engem spektakulären 2:2 op en Enn gaangen. D'Färöer louchen duerch de Knudsen an den Turi scho mat 2:0 a Féierung, hunn no enger rouder Kaart awer den Uschlossgol an den Ausgläich missen kasséieren. An der Schlussphas gouf och nach e Kasach vum Terrain gestallt.
An der Grupp vun de Lëtzebuerger sinn Estland an Island net iwwert en 0:0-Gläichspill erauskomm. Island bleift domadder mat aacht Punkten Tabellenéischten, virun Estland mat sechs Punkten. D'Rout Léiwen konnten dovunner awer net profitéieren. Lëtzebuerg huet sech doheem mat 0:2 géint Bulgarien geschloe misse ginn. De Balov an der 19. an den Iliev an der 34. Minutt hunn d'Goler fir d'Bulgare geschoss. Trotz enger däitlecher Steigerung an der zweeter Hallschent ass de Lëtzebuerger keen Uschlossgol méi gelongen. Domadder zitt Bulgarien mat véier Punkten un de Rout Léiwen laanscht, déi mat dräi Punkten op déi lescht Plaz an der Grupp 4 zeréckfalen.
Déi komplett Resultater, d'Tabellen an d'Statistike fannt Dir hei.
