An eiser Lecture vun heiheem ginn et haut 2 Buchtipps fir jonk Lieser. Bekannte Fabelen op Lëtzebuergesch an dat neit Kannerbuch "So mol, Lobo" eng Geschicht iwwert e Jong dee beschloss huet, net méi ze schwätzen. A fir déi Grouss hu mer eng Invitatioun.D'Bea Kneip huet d'Detailer.

6 Fabelen, de Lobo a Literatur an der Kufa

De Lobo ass e virwëtzege klenge Jong, den de Kapp voller Froen huet. Nëmme just, et wëll keen him nolauschteren! Keng Zäit, net elo, doriwwer schwätze mer méi spéit, et ass fir d'Flemm ze kréien! An esou decidéiert de Lobo, fir einfach...näischt méi ze soen. Komescherweis kënnt en och ganz gutt esou duerch d'Liewen, just seng Bomi wonnert sech e bëssen. D'Lola, dem Lobo seng nei Nopesch, mengt souguer, de Lobo kéint guer net schwätzen. Dat ass allerdengs schued, well eigentlech wéisst de Lobo him vill z'erzielen. Mä da geschitt eppes woumat hien net gerechent hat...

"So mol, Lobo" ass dat drëtt Kannerbuch vun der Christiane Kremer. D'Illustratioune si vun deem jonke Kënschtler Vincent Biwer, den am Fong éischter zoufälleg op säi Beruff komm ass.
An der Geschicht geet et drëms, wéi wichteg et ass, dass ee matenee schwätzt.
"So mol, Lobo" ass bei Kremart Edition erauskomm.

An nach eppes fir déi Kleng: D'Grill an d'Seejomes ass eng vu 6 Fabelen déi fir en neit Kannerbuch op Lëtzebuergesch iwwersat goufen. Mat dobäi sinn och de Meeschter Kueb den sech vun dem schlaue Fuuss ëm de Fanger wéckele léisst, dee klenge Fräsch den net agesi wëll, dass en ni esou grouss ka ginn wéi den Ochs, an dee grousse staarke Léiw, dee géint déi kleng Méck de Kierzeren zitt. Iwwersat goufen dës Klassiker vun der Liliana Miranda, déi faarweg Illustratiounen si vun der portugisescher Zeechnerin Daniela Guedes. "D'Grill an d'Seejomes an nach aner Fabelen op Lëtzebuergesch" ass am Lilu Verlag erauskomm.

Muer ass Vältesdag, den Dag vun der Léift, a wien op dem Dag gäre seng Léift zur Literatur zelebréiere wëll, dee sollt sech dëse Rendezvous an der Escher Kulturfabrik vermierken: Ënnert dem Titel: "Literatur(en) Made in Luxembourg liese 6 Auteuren aus hiere Wierker. D'Christiane Kremer, d'Elise Schmit, de Jeff Schincker, den Tom Reisen, de Gast Groeber, an d'Susanne Jaspers déi aus eegene Wierker liest, awer och Texter vum Georges Hausemer mat am Gepäck huet. Um Programm stinn Texter op Lëtzebuergesch, Franséisch, Däitsch an Englesch déi entweder nei erauskomm sinn, oder eréischt an nächster Zäit wäerte publizéiert ginn. Nieft der Literatur gëtt et och Musek Made in Luxembourg, dat mam Blues-Gitarrist Remo Cavallini.

De Rendez-Vous mat Literatur a Musek ass muer den Owend um 8 Auer an der Escher Kulturfabrik, den Entrée ass fräi!

© Kulturfabrik