Den DC WEB FEST, dee gréissten an eelste Web-Festival an den USA, huet den Event dëst Joer wéinst den Ëmstänn online iwwerdroen.

Datt d’Kultur den Ament éischter op digitale Plattformen ze begéinen ass, ass gewosst. Mat vill Kreativitéit gëtt sech Gedanke gemaach, wéi een de Leit dofir Kultur heem liwwere kann. Laang virun der Corona-Kris huet am Januar d’Lëtzebuerger Produktiounsfirma Six-Letters eng Web-Serie lancéiert, déi exklusiv am Internet ze kucken ass.

Virun e puer Deeg ass "W“, esou heescht se, an den USA ausgezeechent ginn.

Eng Fra steet am Bësch, huet ee Schong verluer, kuckt ronderëm sech a fënnt sech net erëm, ka sech och un näischt erënneren. Kuerz drop gëtt se vun 2 Poliziste festgeholl...

Esou fänkt déi éischt vu 6 Episode vun der Serie un, am Ganze gëtt dës spannend Geschicht a 45 Minutten erzielt. De Frédéric Zeimet, deen als Zeenarist schonn national an international Erfarung huet, huet se konzipéiert. Et war eng Erausfuerderung, besonnesch finanziell, do konnt ee just op de Support vum Filmfong senger „Carte Blanche“ zielen.

Elo huet "W", d'Serie leeft och hei op RTL.lu, beim renomméierten DC Web Fest, dem gréissten an eelste Web-festival an den USA, de "Gold Award“, de Präis fir déi bescht international Web-Serie gewonnen. Eng Auszeechnung, déi sécher méi wéi just Prestige ass.

Wärend der Zeremonie, hunn d’Jury an d’Organisateuren de Mystère vun der Serie ënnerstrach, deen sech lues a lues entfaalt an deen d'Spectateuren dozou oprifft, um Ball ze bleiwen an deemno souguer an d'Verféierung vum "Binge-Watching" kommen.

Et gouf och déi gutt schauspilleresch Leeschtung vun de Schauspiller (Catherine Elsen, Jérôme Burelbach, Fränk Grotz, Claude Faber) ervirgehuewen, d'Qualitéit vum Bild (Rae Lyn Lee) a sinn op d’Aarbecht vum Sound (Lucas Theis, Daniel Balthasar) am Detail agaangen.

Sou niewebäi, waren d'Jury an d'Organisateuren och ganz houfreg, fir déi éischt Kéier an hirem Liewe Lëtzebuergesch ze héieren.

An engem Communiqué wëll d'Ekipp vu Six.-Letters an de Frédéric Zeimet dovunner profitéieren, fir de Leit Merci ze soen, déi si bei der Produktioun vun der Serie ënnerstëtzt hunn. An natierlech ass esou e Präis och en Encouragement fir eng nei Staffel oder eng nei Web-Serie.

De Frédéric Zeimet am RTL-Interview wéi d'Serie online gaangen ass

Interview mam Frédéric Zeimet iwwer "W"