Vun engem Dag op den aneren huet sech mam Krich an der Ukrain alles verännert. Vill Mënschen hu missen aus hirer Heemecht flüchten, dorënner vill Kanner.

Quasi iwwer Nuecht hunn dës Kanner net just hir Heemecht verlooss, si hunn hiert Doheem verlooss, hir Famill, hir Kolleegen, alles, wat si kennen a gär hunn. Vill vun hinnen hu Schreckleches gesinn an erlieft, hu laang Strapazen op sech missen huelen, fir um Enn an engem komplett frieme Land unzekommen. Wéini si dierfen zeréck, ass net gewosst, wat se nach virfannen, nach manner.

Fir dat Traumatescht besser kënnen ze verschaffen, huet déi gebierteg Ukrainerin Olga Strobel, déi schonn eng länger Zäit an Däitschland wunnt an d'Sprooch fléissend schwätzt, sech zur Aufgab gesat, de Kanner nees e klengt Laachen zeréckzeginn, e Stéck Gebuergenheet, e klengt Stéck Heemecht. A wat wier dofir bessert gëeegent, wéi Kannerbicher. Déi kuerz Zäit vum Virliesen, léisst d'Kanner fir dee Moment de Krich an dat Erliefte vergiessen.

Vun där Iddi war och d'Susanne Krebs, Cheffin vun der "Penguin Random House Verlagsgruppe" begeeschtert. An deem Sënn léisst de Verlag d'Bicher op ukrainesch iwwersetzen a stellt se duerno als PDF-Download zur Verfügung. Et hätt een dobäi op Bicher zeréckgegraff, déi am Grondschoulalter kënne benotzt ginn, z.B. d'Billerbuch "Kleiner Drache Kokosnuss" vum Ingo Siegners. Sämtlech Bicher bidde sech un, fir de Kanner elementar Begrëffer och direkt zweesproocheg ze vermëttelen. Iwwersat goufen awer och Bicher fir Jugendlecher.

D'Olga Strobel huet zesumme mat zwou aneren Iwwersetzerinnen, Lesya Skintey a Olha Rachynska, d'Bicher fir d'Alterskategorien 3 bis 15-16 Joer iwwersat. Ze fanne si se um Site vum Verlag.