Den Auteur Reinhard Kaiser-Mühlecker
De Podcast dës Woch mam éisterräichesche Schrëftsteller Reinhard Kaiser-Mühlecker, deen op Liesrees zu Lëtzebuerg war.
Hien ass Auteur a Bauer a fir de Reinhard Kaiser-Mühlecker si béid Beruffer Passiounen a béid Passioune vermësche sech och a senge Bicher. Dobäi sinn et keng Sachbicher, mee Romaner an deenen d'Geschichten am ländleche Raum spillen mat allen Erausfuerderungen, Krisen an Engagementer, déi haut d'Landwirtschaft kennt.
Aacht Romaner huet den Eisterräicher scho geschriwwen an all goufe se vun der Kritik gutt opgeholl an deels och ausgezeechent. Fir säi leschte Roman "Wilderer" (2022 bei S. Fischer) krut hien de bayresche Buchpräis a war och fir den däitschen an den éisterräichesche Buchpräis nominéiert.
Am Abrëll war de Reinhard Kaiser-Mühlecker zu Lëtzebuerg. Bei dëser Liesrees huet hien, nieft dem LiteraTour zu Beetebuerg, och Statioun um Kasshaff gemaach, wou d'Christiane Kremer sech mat him ënnerhalen huet iwwer säin Don a seng Motivatioun fir ze schreiwen a Bauer ze sinn an iwwer seng ganz besonnesch an zäitgenëssesch "Heimatromaner".
Homepage vum Reinhard Kaiser-Mühlecker
Podpurri - mir schwätze Kultur, dat ass 3 Mol d'Woch um Radio, op RTL.lu, op RTL Play an als Podcast op Spotify an iTunes.
