D'Schlass zu Schengen geet op eng Waasserbuerg aus dem 13. Joerhonnert zeréck. Erhalen ass haut awer nëmmen nach ee vun de véier Tierm

D'Schengener Schlass gouf fir d'éischte Kéier 1350 schrëftlech ernimmt. Nodeems de Proprietär e puer Mol gewiesselt hat, ass et 1793 an de Besëtz vum Industrielle Jean-Nicolas Zollamt iwwergaangen.

Hien huet dee gréissten Deel vum Schlass ofrappe gelooss an 1812 dat haitegt Gebai gebaut, wat éischter als Härenhaus bezeechent ka ginn. Erhalen ass nach ee vun de véier Tierm vun der fréierer Waasserbuerg, dëse gouf dann och 1968 an d'Lëscht vun de klasséierte Monumenter opgeholl.

1939 huet d'Kongregatioun Soeurs Sainte Elisabeth d'Schlass iwwerholl an als Vakanzenzentrum respektiv fir Konferenze genotzt. Tëscht 2010 an 2014 war en Hotel am Gebai. Duerno stoung et eidel. E Lëtzebuerger Geschäftsmann huet dunn am Joer 2016 fir 11 Milliounen Euro d'Schlass mat senge 5.000 Quadratmeter an dem 1,3 ha groussen Terrain kaaft.

Dee bekanntste Gaascht war de franséische Schrëftsteller Victor Hugo.

Den Domingos Oliveira huet sech fir déi méi "verstoppte Plazen", respektiv déi al Gebaier interesséiert, déi nach vu fréier erhale bliwwe sinn.

Iwwer dës Serie

An dëser Serie bréngt RTL Iech Impressioune vu bekannte Plazen, déi et geschwënn net méi gëtt, well si ofgerappt ginn oder soss "verstoppt" sinn. Hei en Iwwerbléck mat all de Sujeten.