80 Betriber invitéieren an iwwer 170 Ausstellungsraim.

E Méindeg huet déi 58. Editioun vum Autosfestival ugefaangen. Dëse geet iwwer zwou Woche vum 24. Januar bis de 5. Februar inclus. D’Garagë maachen dofir och Sonndes den 30. Januar hir Dieren op. Virun allem d’Elektromobilitéit kéint vun dësem Festival profitéieren.

Autofestival 2022 / Reportage Sabrina Backes

Eng 80 Concessionnairë maachen dëst Joer beim Autosfestival mat. Op méi wéi 170 Ausstellungsraim kënne sech Interesséierter nei Modeller ukucken, dat Ganzt am Respekt vun de sanitäre Mesuren. Dowéinst gëtt och keen Iessen a Gedrénks zerwéiert.

Am Joer 2021 sinn iwwer 44.000 nei Autoen ugemellt ginn. D'Demande ass ëmmer nach op héijem Niveau, mä d’Offer kënnt net richteg no. Wéinst enger Penurie bei de Mikrochippe kënne vill Autoen eréischt mat Verspéidung ausgeliwwert ginn. Et kéint also zu méi laange Waardezäite kommen, erkläert de President vun der Autos-Federatioun FEDAMO Philippe Mersch. Um Festival si ganz sécher Autoen ze verkafen. Dir gesitt hei ass de Showroom voll. Et sinn och Stocken do. D'Garagen hunn am Virfeld probéiert, esou vill wéi méiglech Stocken ze kréien. Et ass awer och elo sou, dass wann der ee ganz prezisen Auto wëllt bestellen, deen net op Stock ass, dass dann Delaie relativ laang kënne sinn. Dir kënnt een Auto bannent zwee Méint geliwwert kréien, Dir kënnt awer och villäicht ee Joer waarden.

Am grousse Ganze ginn d’Verkafszuele beim Bensinner a beim Diesel erof. De Schwéierpunkt läit elo wesentlech méi op der Elektromobilitéit. 2021 goufe méi Elektroautoe verkaaft wéi an all de Jore virdrun. Mir hu lo méi Clients déi elektresch Autoe fueren. Virun zwee, dräi Joer waren et Freaken, déi wierklech op déi Autoe gestouss sinn a wéi gesot, dat ass elo vill méi diversifiéiert.

Fotogalerie - 1. Deel

Vergläichsplattform Oekotopten.lu fir Elektroautoen

Wie sech fir en Elektroauto intresséiert, dee ka sech op Oekotopten.lu informéieren. Dat ass eng Vergläichsplattform fir vollelektresch a méiglechst ressourcëfrëndlech Autoen. De Camille Muller vum Ökozenter Pafendall iwwer d’Critèren, déi en Auto erfëlle muss. Den Haaptcritère ass de Verbrauch. Do sinn alleguer d’Autoen, déi just véier Sëtzplazen hunn, déi dierfe maximal 16 kW an der Stonn op 100 Kilometer verbrauchen. Alles wat fënnef Plazen ass do ass e maximale Verbrauch vun 18kW pro Stonn op 100 Kilometer erlaabt. Alles wat elo bësse méi geraimeg ass bis maximal 9 Plazen, déi kënnen och bis 27kw pro Stonn verbrauchen.

E weidere Virdeel, dee fir en Elektroauto schwätzt, ass, dass d’Käschte fir d'Uschafung sech net méi grouss zu deene vun engem thermeschen Auto ënnerscheeden. E klengen Auto mat 4 Plaze gëtt et scho fir e Basispräis vu 17.000 Euro. Bis den 31. Mäerz ginn et och nach Primme vu bis zu 8000 Euro.

Och d’Technik hannert den Elektrogefierer verbessert sech ëmmer weider. De Camille Muller erhofft sech lo nach, dass den Elektroauto an Zukunft méi ressourcëfrëndlech auskomme wäert an och d‘Batterie ënner méi faire Bedéngunge wäert produzéiert ginn.

Konsumenteschutz mécht Rappell wéinst Kreditter

Fir den Ulass huet de Ministère fir de Konsumenteschutz e Rappell gemaach, u wat sech Kredit-Intermediairë mussen halen. Et ass zum Beispill verbueden, Pub ze maachen, déi spezifesch dorobber axéiert ass, wéi einfach a wéi séier een e Kredit ka kréien. Donieft misst een dem potentielle Client all d’Informatiounen an d’Zäit ginn, déi e brauch, esou wéi de Code de la consommation et virgesäit. Natierlech musse Kredit-Intermediairen hir Cliente virwarnen, wéi eng zousätzlechen Fraisen op se kéinten duerkommen.