Knapp 5 Joer nom Aussetze vum Bommeleeër-Prozess kënnt nees Beweegung an d'Affär, an dat vläicht mat engem Theatercoup, esou RTL-Informatiounen.

Den 2. Juli ginn et genee 5 Joer, dass de Bommeleeër-Prozess ausgesat gouf. An där laanger Zäit hunn eng hallef Dosen nei Enquêteure gekuckt, fir erauszefannen, ob genuch Indicen do sinn, fir déi fréier Gendarmerie-Kaderen Aloyse Harpes, Charel Bourg, Pierre Reuland, Armand Schockweiler a Guy Stebens an den Ex-Brigade-mobile-Member Marcel Weydert eventuell als Auteur, Co-Auteur oder Kompliz vun den Attentater mat op d'Uklobänk ze bréngen.

Mä domat war d'Aarbecht vun den neien Enquêteuren net gedoen: Si sollten donieft kucken, ob sech aner Zeien am Prozess a Widderspréch verwéckelt hätten. RTL-Informatiounen no ass hir Enquête elo souwäit fortgeschratt, dass den nächste Mount - wat engem weideren Theatercoup gläichkéim - 3 deemoleg Enquêteuren, dorënner de Chef Paul Haan, kéinten inculpéiert ginn.

AUDIO: Neie Moment an der Bommeleeër-Affär: Rep. Eric Ewald

Allzäit hunn déi 3 an der zweeter Hallschent vum Juni Rendez-vous beim Juge d'instruction-directeur Ernest Nilles, fir eventuell an dëser Affär wéinst Falschausso beschëllegt ze ginn. Konkret kréie si de Reproche gemaach, als Zeien am Prozess ënner Eed d'Wourecht verfälscht ze hunn, an zwar wat eng Observatioun vum Ben Geiben am Oktober 1985 zu Bréissel ugeet. Deemools sollt den Ex-Brigade mobile-Chef an der belscher Haaptstad iwwerwaacht ginn, respektiv sollten d'Enquêteuren Informatiounen iwwert dee Verdächtegen zesumme kréien.

D'Leit ëm de Paul Haan soten awer am Prozess, haut nach net ze wëssen, firwat si mat waren; si kéinte sech just drun erënneren, mat hire belsche Kollege Kiischtebéier gedronk ze hunn, ma fir de Rescht wäre si lénks leie gelooss ginn. Kuerz nom Echec vun där Bréisseler Missioun war et dunn zum Attentat op de Geriichtspalais an der Stad komm.

Donieft geet et ëm ënnerschiddlech Aussoen, am Prozess, vun - engersäits - dem Ex-Chefenquêteur an - anerersäits - dem deemolege President vum Handelsgeriicht Pierre Gehlen; d'Divergenzen hunn ëm eng Entrevue tëscht ë.a. hinnen zwee kuerz virun deem Attentat op de Palais de Justice gedréint.

Deemno kéint aus enger Ausso, déi de Procureur d'État adjoint Georges Oswald zejoert an engem RTL-Interview gemaach hat, Realitéit ginn: An zwar datt nieft de 6 Beschëllegungen, well déi Leit sech a Widderspréch oder Onsënnegkeete verwéckelt hätten, och nach aner Personnagen an den Dossier kéinten integréiert ginn, wa sech dat géif erginn. An och wann een net zu der Konklusioun kënnt, datt se Co-Auteur oder Kompliz waren, esou kéint een hinnen awer op d'mannst virwerfen, zum Deel gelunn ze hunn oder eng Entrave à la justice gemaach ze hunn an dofir misste si sech da veräntweren.

Bei den 3 deemolegen Enquêteure vun haut 82, 78 an 69 Joer doheem war et 2017 zu Perquisitioune komm; dobäi ware Computeren an Ënnerlage matgeholl ginn, an déi 3 waren dono och vun hire Successeure gehéiert ginn. Als Konsequenz heivu kéinten d'Ex-Enquêteuren also elo (wéi gesot wéinst Falschausso) nieft de fréiere Gendarmeriekaderen Aloyse Harpes, Charel Bourg, Pierre Reuland, Armand Schockweiler a Guy Stebens an dem Ex-Brigade-mobile-Member Marcel Weydert (si als méiglech Auteuren, Co-Auteuren oder Komplize vun den Attentater) beschëllegt ginn