Géint de Gast Gibéryen gëtt et kee Prozess wéinst enger illegaler Ecoute. Hie seet awer de Xavier Bettel an d'Doris Woltz hätte géint d'Gesetz verstouss.

AUDIO: Affär ëm illegal Ecoute / Reportage Eric Ewald

An der Affär ëm eng illegal Ecoute vum Geheimdéngscht aus dem Joer 2017, kënnt et net zu engem Prozess géint de Gast Gibéryen. Dat huet den adr-Deputéierten e Freideg de Moien an enger Pressekonferenz erkläert. Virun engem knappe Mount huet d'Chambre du Conseil vun der Cour d'appel an der Stad nämlech en entspriechend Uerteel gesprach.

Dora steet, dass d'parlamentaresch Immunitéit d'Gebrauche vun Informatiounen iwwer Dysfonctionnementer a Staatsservicer ofdeckt, am anere Fall kéint en Deputéierte seng Roll als Kontrollorgan net spillen. De Gast Gibéryen hätt als Deputéierte vun där illegaler SREL-Ecoute gewosst, andeems hien eng parlamentaresch Fro dozou gestallt hätt. Den adr-Politiker hätt am Kader vu senge Funktioune gehandelt. Hie géif dowéinst vun der parlamentarescher Immunitéit profitéieren, sou dass d'Poursuite géint hien irrecevabel z'erkläre wären, sou d'Riichter.

Am Mäerz 2017 hat hien dem Premier Xavier Bettel gesot, zanter Woche vun där illegaler Ecoute ze wëssen, de Gast Gibéryen hat dem Staatsminister awer net matgedeelt, wiem him dat gesot hat. Doropshin hat d'Doris Woltz, Direktesch vum Geheimdéngscht, Plainte géint Onbekannt gemaach an de Politiker war vum Juge d'instruction directeur Ernest Nilles beschëllegt ginn. E Freideg de Moien huet den adr-Deputéierte vun engem ganz wichtegen Uerteel geschwat.

AUDIO: Extrait Gast Gibéryen (1)

An der Enquête ëm dës Ecoute, hat de Parquet eng Saisie bei der Post gemaach an all d'Telefonsnummere sinn iwwer eng ganz Rei Woche kontrolléiert ginn. "Dat ass e staarkt Stéck an engem Rechtsstaat", seet de Gast Gibéryen. Domat wär de Whistleblower am Staatsdéngscht Realitéit.

De Gast Gibéryen huet awer och betount, dass de Xavier Bettel géint d'Gesetz verstouss hätt, well hien déi illegal Ecoute net beim Parquet denoncéiert hätt. Hie selwer wär am Ufank relax gewiescht, bis zwee Politiker hie gewarnt hätten, dass hie sollt futti gemaach ginn a sech net onglécklech maache sollt.

AUDIO: Extrait Gast Gibéryen (2)

Mat senger Partei wär hie bis op Stroossbuerg gaangen, fir Recht ze kréien, sot de Politiker e Freideg de Moien, deen anengems der Justiz säi Respekt ausgeschwat huet.