Well de Jean-Claude Juncker d'Ecoute ordonéiert hätt, dierft de fréiere Premier net als Zeien am Prozess gehéiert ginn, esou d'Affekote.

35 Minutten huet se e Mëttwoch am Nomëtten um Stater Geriicht gedauert. Déi mat vill Spannung erwaarten Depositioun vum Ex-Premier Jean-Claude Juncker am SREL- oder Frisbee-Prozess.

Fir dëse wuel wichtegste Moment vun deem Prozess war de Publikumsintressi vill méi grouss wéi nach gëschter: Quasi keng vun de Sëtzplazen am gréisste Sall vum Stater Geriicht blouf haut eidel! De fréiere Staatsminister blouf iwwerdeems bei senger Ausso, keng konkret Erënnerung dorun ze hunn, dass hien eng Ecoute op den Elektronikspezialist Loris Mariotto autoriséiert hätt.

Jean-Claude Juncker am SREL-Prozess / Eric Ewald

Am SREL Prozess huet um 2. Dag de fréiere Premier Jean-Claude Juncker ausgesot an erkläert, datt hie keng konkret Erënnerung drun hätt, ob hien eng Ecoute op den Elektronikspezialist Loris Mariotto autoriséiert hätt.

Ech war fest dozou decidéiert, de Loris Mariotto oflauschteren ze loossen, wéinst där Rumeur, déi de Fonctionnement vum Staat schwéier a Fro gestallt hätt! Wann ech gefrot gi wär, da wéisst ech et! Dat sot den Zeie Jean-Claude Juncker am Nomëtten um Stater Geriicht a senger Depositioun am SREL- oder Frisbee-Prozess.

Den fréiere Premier huet erkläert, hie kéint sech net un e Gespréich mam deemolege Geheimdéngschtchef Marco Mille iwwer eng Ecoute op den Elektronikspezialist Mariotto erënneren. Et kéint sinn, dass de SREL-Chef Marco Mille him zweemol ugeruff hätt, wéi him dono gesot gi wär, ma hie wéisst dat net.

De fréiere Staatschef hätt och gewollt, datt déi presuméiert CD mat engem Gespréich tëscht him an dem Grand-Duc Henri drop sollt dechiffréiert ginn, wéinst der Bommeleeër-Affär, esou de Jean-Claude Juncker viru Geriicht.

An um 1. Dag vum Prozess haten d’Affekote kritesch ugemierkt, de fréiere Premier dierft net als Zeien optrieden, well hien et eben gewiescht wier, deen déi ëmstridden Oflauschteraktioun op den Elektronikfachmann Loris Mariotto ordonéiert hat.

Dat wier däitlech ze héieren am ominéise Gespréich, dat de SREL-Chef Marco Mille mam Premier gefouert hat an dat dee mat der Spionage-Auer enregistréiert hat. Hei nach eng Kéier de wichtegste Passage aus deem Gespréich, ongeschnidden a mat der komescher Aueren-Akustik.

Extrait Juncker vs Mille

En Donneschdeg de Moie gëtt am SREL- oder Frisbee-Prozess ënner anerem dat ominéist Aueregespréich tëscht dem Marco Mille an dem Jean-Claude Juncker gelauschtert: De President vum Geriicht huet dat e Mëttwoch um Ufank vun der Sëtzung bekannt ginn. Op de Gros vun de juristesche Kriticke vun den Affekoten, gëschter, mat ënner anerem der Fro nom Délai raisonnable, ginn d'Riichter iwwerdeems am Urteel an. D'Enquêteuren hirersäits kommen e Freideg drun!

Dat ganzt Gespréich tëscht Juncker a Mille

Déi 3 Ugekloten hunn d'Virwërf ofgestridden, respektiv erkläert, näischt mat der Écoute op de Loris Mariotto ze di gehat ze hunn.

Dem Marco Mille no wären all d'Aktivitéite legal gewiescht an hätt de Premier Jean-Claude Juncker gesot, de Loris Mariotto d'urgence op Écoute ze setzen. Deen heite Fall wär eenzegaarteg an et wier dofir hir Interpretatioun gewiescht, fir net bei de Gremium vun 3 Riichter ze goen, dee sou eng Écoute u sech nach positiv hätt missen aviséieren. D'Aueregespréich hätt hie missen ophuelen, sou de Marco Mille, deen dem Jean-Claude Juncker doropshin ugebueden hätt, Zitat: „Wann s De wëlls, dann demissionéieren ech!“

Fir de Fränk Schneider wär iwwerdeems kloer gewiescht, dass eng Autorisatioun fir d'Écoute op de Loris Mariotto virlouch. Déi Oflauschteraktioun wär dann och net illegal an dat Ganzt eng Decisioun vum Premier gewiescht.

Den André Kemmer huet betount, de Loris Mariotto wär am Dezember 2005 mat der Informatioun komm, dass hie vun zwee Leit vum Haff eng CD kritt hätt, déi net ze liese war an an där et, Zitat, „ëm de Bommeleeër gaange wär an och net!“; dora wär ënner anerem  vun engem Tourbillon fir d'Land Rieds gewiescht. D'Wuert Tourbillon hätt de Jean-Claude Juncker méi spéit och zouginn. Hien, André Kemmer, hätt dem Marco Mille déi ominéis Auer ginn, fir de fréiere Staatsminister opzehuelen. Dee wär a sengen Aen iwwert d'Écoute op de Loris Mariotto informéiert gewiescht, an hie selwer, André Kemmer, hätt op Uerder vu sengem Chef gehandelt.

AUDIO: Juncker am Prozess / Reportage Nico Graf