D'Ausgangspär an Italien schéngt ze wierken. Déi strikt Mesurë solle bis op d'mannst den 12. Abrëll verlängert ginn.

Dat huet de Gesondheetsministère e Méindeg annoncéiert. Mat iwwer 75.000 Infizéierten an 11.500 Doudegen ass Italien am schlëmmste vun der Pandemie betraff.

Weltwäit ginn et elo eng 786.000 confirméiert Coronavirus Infizéierter a bal 38.000 Doudesaffer, awer och 166.000 Patienten, déi nees gesond sinn.

A Russland gëllt vun e Dënschdeg un eng Ausgangsspär a méi wéi der Hallschent vun de 85 Regioune vum flächeméisseg gréisste Land um Planéit. A 40 Verwaltungsregiounen däerf ee just nach fir den absolutte Minimum virun d'Dier, dorënner falen och d'Milliounemetropole Moskau, St. Petersburg oder Yekaterinenburg. Wie sech net drun hält, riskéiert Geldstrofe vun iwwer 5.000€.

De franséische President Macron huet e Méindeg annoncéiert, dass déi franséisch santé publique mat 4 Milliarden Euro ënnerstëtzt gëtt, fir d'Commandë fir Masken, Medikamenter a Beootmungsapparater ze finanzéieren. Et wier eng exzeptionell, mä awer noutwendeg Mesure, fir Frankräich méi onofhängeg ze maache beim noutwendege Material an der aktueller Kris, sot de Macron wärend enger Visitt en Dënschdeg de Mëtteg vun enger Fabrick bei Angers, déi Otemschutzmaske produzéiert.

An Däitschland sinn et knapp 63.000 confirméiert Coronavirus-Infizéierter an iwwer 560 Doudeger. Am stäerksten ass Bayern betraff. Besonnesch d'Hausse vun Infizéierten an den Alters- a Fleegeheemer mécht de Bundeslänner Suergen.

D'USA verbidden Europäer weiderhin, fir an d'USA anzereesen. De Verbuet sollt nëmme bis Mëtt Abrëll gëllen. E gëtt awer elo verlängert, sou de President Trump. Wéi laang, gouf awer net preziséiert.  Den Donald Trump huet och Hëllefe vun 100 Milliounen Dollar fir Italien an aner Länner annoncéiert, déi vun der Coronakris getraff sinn.

Well d'Spideeler zu New York iwwerlaascht sinn, schéckt d'Marine e Lazarett-Schëff an d'Stad. Et huet 1'000 Better an 12 OP-Säll. Fir d'lescht war dat Militär-Spidol nom 11. September 2001 zu New York.

Der Metropol wäert d'Schëff elo awer nëmme minimal hëllefen. De Buergermeeschter mengt, datt een u sech 40 där Schëffer géif brauchen. Den Héichpunkt vun der Kris zu New York gëtt eréischt an zwou bis 4 Wochen erwaart. Bis dohinner sollen 8 provisoresch Spideeler opgoen.

Air Canada schéckt wéinst dem Coronavirus eng 16.500 Salariéen an de Chômage technique. D'Aktivitéite vun der Fluchlinn ginn ëm déi 90% reduzéiert.

Méi speziell Quarantän-Mesuren ginn et a Panama. Do däerfe Fraen a Männer nëmme getrennt virun d'Dier, an dat och just u verschiddenen Deeg.

D'Europäesch Unioun wëll jo mat 37 Milliarden Euro, der Ekonomie an de Gesondheetssystemer wéinst der Pandemie hëllefen. E Méindeg gouf et den definitive Feu-vert.  D'Sue kommen aus der EU-Regionalhëllef an aus dem EU-Solidaritéitsfong.