An Däitschland gouf e Sonndeg en neie Bundestag gewielt, an et ass e ganz enkt Resultat erauskomm. D’SPD kéim deemno op 25,7% vun alle Stëmmen.

Bundestagswalen an Däitschland - Rep. Claudia Kollwelter

Mat deem Resultat huet d'SPD d'Wal gewonnen. D'CDU/CSU kënnt op 24,10%.

Do hannendrun leien déi Gréng mat 14,8% an d’FDP mat 11,5, respektiv d’AfD mat 10,4%. Déi Lénk komme just op 4,9% a wieren deemno un der 5%-Grenz fir an de Bundestag gescheitert. Iwwert d'Direktmandater geet et dann awer duer, fir an de Bundestag ze kommen.

Dat sinn déi definitiv Resultater, nodeems alleguerten d’Wal-Kreesser ausgezielt sinn, an e Méindeg de Moien um 5 Auer publizéiert goufen. Aus deem Resultat ergëtt sech, dass d'SPD op 206 Sëtz am Bundestag kéim, 196 fir d'Unioun, 118 fir Déi Gréng, 92 fir d'FDP, 83 fir d'AfD an 39 fir déi Lénk an 1 fir de Südschleswigscher Wählerverband.

Duerch déi Konstellatioun kënnt et zu enger neier Rekordzuel u Memberen am Bundestag, dat mat 735 Deputéierten. Virdru waren et der 709, wat och schonn eng Rekordzuel war.

SPD no Walen an Däitschland / Rep. Claudia Kollwelter

Koalitiounsverhandlungen

Deemno stinn elo Koalitiounsverhandlungen un, déi eng Zäitchen dierften daueren. Souwuel d’SPD mam Olaf Scholz, wéi awer och d’Unioun mam Armin Laschet, wëllen eng nei Regierung féieren.

Déi Gréng an d’FDP dierften domadder decisiv ginn. Dëst wësse si och an dowéinst huet den FDP-Chef Christian Lindner scho proposéiert, mat deene Gréngen Diskussiounen ze starten. Wa si sech dann eens wieren, wier et just nach d'Fro, ob si léiwer mat enger SPD oder mat enger Unioun an d'Regierung géife goen.

Mat der AfD wëll jo kee Verhandlungen féieren.

D’Féierungsgremie vun de Parteien gesinn sech um Méindeg de Moien fir iwwert d’Resultater ze beroden, a wäerten dann noeneen och eng Analys virun der Press maachen.

Direkt e puer däitsch Wirtschaftsverbänn hunn dann schonn e Sonndeg den Owend en Appell lançéiert, dass Koalitiounsverhandlungen net nees Wochen- oder méintelaang dierften daueren.

Wéinst éischter schlechten ekonomeschen Date misst ee séier eng regierungsfäeg Koalitioun zustane kréien, heescht et vu méi Verbänn, wéi deem vum Mëttelstand, der Digitalisatioun, oder dem Baussenhandel.

Et géif een sech elo beméien eng Regierung ze bilden mat de Parteien déi dës Walen gewonnen hunn huet den Olaf Scholz um Méindeg de Moie betount.

"Dat ass d'SPD mat enger Hausse u Stëmmen, déi Gréng an d'FDP an dofir wëllen mer de Wee och zesummen mat hinnen ugoen."

Eng sozial-ökologesch-liberal Koalitioun wier genee dat, wat d'Land bräicht, fir den Erausfuerderungen gerecht ze ginn, huet den SPD-Kanzlerkandidat ënnerstrach.

All d'Parteien, déi en Erfolleg bei dëse Walen haten, si Parteien, déi scho matenee regéiert hunn an der Geschicht an et och a verschiddene Bundeslänner maachen an kloer ass och, datt keen um Vott vun de Wieler a Wielerinnen ka laanscht goen, ouni Schued unzeriichten. An et ass schonn zimmlech däitlech, datt vill sech wënschen, datt mir di nächst Regierung bilden.

Den SPD-Chef Olaf Scholz huet dann och schonn seng Hoffnung ausgedréckt, datt een d'Koalitioun viru Chrëschtdag zesummen hätt.

RTL
Bundestagswalen - E Reportage vum Annick Goerens

All weider Detailer an News an eisem Liveticker: