Déi eng flüchte virun der Hëtzt, anerer fueren op déi wäermste Plazen, wéi dës Touristen am Death Valley an den USA.

Am Death Valley gëtt et eng Plaz, déi méi waarm ass, wéi all déi aner. Op dëser Plaz ass et awer elo mat 55 Grad Celsius nach méi waarm wéi soss, seet d’Gia Ponce, déi hei Park Ranger ass. "Déi leschten Deeg an och d’nächst Woch wäert et eng Hëtzt ginn, wéi mer se nach ni haten. Eisen nationale Wiederdéngscht huet eng Hëtztwarnung erausginn an huet ugekënnegt, dass dës Temperaturen un déi aktuell Rekorder wäerten erukommen,  wann net esouguer se briechen." Dëse Rekord läit zanter 1913 bei 56,67 Grad Celsius, och wann dëst haut ëmstridden ass a verschidden Experte soen, datt de Rekord 2021 mat 54,4 Grad gemooss gouf.

D’Touristen am Death Valley freet et. Si kréien eng Foto, wéi bal keen se huet. "Wéi vill Leit op der Welt kënne soen, dass se op der wäermster Plaz op der Welt waren? Et ass bal wéi op de Mount Everest ze klammen", seet en Tourist.

Rekorder ginn net just am Death Valley gebrach. Ma weltwäit . An de leschten 12 Méint louchen d’Duerchschnëttstemperature weltwäit 1,5 Grad iwwert der Moyenne, mellen déi Responsabel vum Copernicus Weltobservatiounsprogram vun der Europäescher Unioun.

"Et ass den Ament en temporäert Iwwerschreide vun dëser 1,5 Grad Grenz. Et heescht net, dass mer d’Limitt, déi mam Paräisser Ofkommes gesat ginn ass, gebrach hunn, mee et kann eis weisen, dass mer méi no kommen. Et ass eng Warnung, d’Klima erwiermt sech séier", seet de Julien Nicolas, Klimafuerscher bei Copernicus.

Mount fir Mount sinn zënter Juni 2023 Rekorder gebrach ginn. Den EU Klima-Monitoring Service huet matgedeelt, dass de Juni 2024 de wäermste war, de jee gemooss ginn ass.