RTL - Wéinst presuméierter Mordmenace géint den Donald Trump: US-Autoritéiten ermëttele géint fréieren FBI-Chef James Comey

Well hien op Instagram eng Foto mat méiglecherweis zweedeitegem Message verëffentlecht huet, gëtt elo géint den Ex-FBI-Chef ermëttelt.

Dat huet ënner anerem den aktuellen FBI-Chef Kash Patel um Kuerznoriichtendéngscht X confirméiert. Och d'US-Ministesch fir Heemechtsschutz Kristi Noem schreift op X, datt hire Ministère an och den US-amerikanesche Geheimdéngscht d'"Menace" ënnersichen an "adequat drop reagéiere" wäerten.

We are aware of the recent social media post by former FBI Director James Comey, directed at President Trump. We are in communication with the Secret Service and Director Curran. Primary jurisdiction is with SS on these matters and we, the FBI, will provide all necessary support.
— FBI Director Kash Patel (@FBIDirectorKash) May 15, 2025

De Comey hat op Instagram eng Foto gepost, op där Muschelen d'Zuelen 86 a 47 formen a geschriwwen "Cool placéiert Muschele bei mengem Spadséiergang op der Plage". "86" ass an den USA eng ëmgangssproochlech Bezeechnung fir een oder eppes ze eliminéieren, den Donald Trump ass de 47. President vun den USA.

I don’t know what James Comey meant by posting this but he has since deleted it. pic.twitter.com/KxseAjDECe
— Evan (@daviddunn177) May 15, 2025

Entretemps huet den James Comey de Post nees geläscht an eng Stellungnam verëffentlecht, an där hie bestreit, e Message wéilten auszedrécken, oder gewosst ze hunn, datt verschidde Leit "dës Zuele mat Gewalt a Relatioun bréngen". Hie wier géint Gewalt an hätt d'Foto dowéinst geläscht.

Sieh dir diesen Beitrag auf Instagram an

Ein Beitrag geteilt von James Comey (@comey)

Den 13. Juli zejoert war den Donald Trump wärend engem Walkampfoptrëtt am Pennsylvania nëmme knapp engem Attentat op hien entgaangen. Hie war um Ouer blesséiert ginn. Opgrond vun der aktuell ugespaanter politescher Atmosphär zanter den Trump nees President ass, besteet am Wäissen Haus d'Suerg, datt et nees zu Gewalt komme kéint.