Et wier ze fréi, fir en definitive Bilan vun der Policereform vun 2018 ze zéien, esou de Police-Minister François Bausch an der Chamber.

De Wee, fir d'Police ze reforméieren, hätt scho vill Joren um Bockel, esou de Minister. Ewéi sou dacks, louch de Fokus nees bei der Problematik ronderëm de Rekrutement, deen ze laang vernoléissegt gouf, esou de Minister.

"Mir hu bei der Police nach ëmmer chronesche Personalmangel, mat deem mer geplot sinn. Mir hunn dësen nach ëmmer net behuewe kritt an dat mécht et eis am Alldag beim Schaffe vill Misär, fir datt déi Reform och ka gräifen, esou wéi mer se eis alleguerte virgestallt hunn."

D'Covid-Kris hätt der Police vill Ressourcen ofverlaangt a bewisen, datt de Rekrutement ganz uewen op der Lëscht muss stoen.

Virun allem an de méi ländleche Regioune koum et duerch d'Reorganisatioun vum Territoire an de leschte Joren zu organisatoresche Problemer, déi am Fong duerch d'Noréckele vun neiem Personal séier geléist wieren, esou och de Constat vun der Oppositioun.

"Ech mengen, vill Buergermeeschteren hu sech Suerge gemaach. Ass nach genuch Police fir de Bierger do? Si genuch Uspriechsméiglechkeeten do fir d'Gemengen? Alles berechtegt Suergen. Dat funktionéiert sécherlech nach net alles, esou ewéi et soll, mä dat huet virun allem domat ze dinn, datt mer nach ëmmer e chronesche Personalmangel hunn.“

An Zukunft EU-Auslänner bei der Police Grand-Ducale?

An der Diskussioun ëm de Rekrutement ass vum Stéphanie Empain vun déi Gréng dann och d'Fro vun der Nationalitéit opgeworf ginn. Verschidde Konditiounen, wéi d'Kenntnisser vun der Lëtzebuerger Sprooch, kéinte jo bäibehale ginn, heescht et. Dëse Virschlag kéint jo envisagéiert ginn, wann de Personalmanktem net géing ofhuelen.

Den CSV-Deputéierte Léon Gloden geet ee Schrëtt méi wäit. An enger kuerzfristeger Motioun huet den Deputéierten eng Proposition de loi virgestallt, deen et EU-Auslänner kéint erlaben, der Police bäizetrieden. Ënnert der Konditioun, datt de Kandidat déi 3 Sprooche vum Land kann a mat der Optioun, datt duerch den Asaz bei der Police d'Waardezäit vu 5 Joer, fir d'Lëtzebuerger Nationalitéit unzehuelen, verkierzt gëtt. D'Motioun gouf mat 54 Jo-Stëmmen, 4 Nee-Stëmmen an 2 Enthalungen ugeholl.

Och de Minister fir bannenzegt Sécherheet, François Bausch, huet d'Motioun eng „excellent Saach" fonnt. E Punkt, deen an der aktueller Situatioun kéint hëllefen.

Am Virfeld gouf e Plan de recrutement mat der zoustänneger Gewerkschaft ausgeschafft. Zukünfteg soll och an der Karriär B nogebessert ginn.

Luef koum vun der Oppositioun. Et wier een um richtege Wee. E puer Verbesserungsméiglechkeete gesäit een awer nach. Den CSV-Deputéierte Léon Gloden freet virun allem e Kader fir de Plazverweis.

"Datt et inakzeptabel ass vun der Mendicité organisée, datt Diere vun de Geschäfter zougesat ginn. Do muss agéiert ginn."

Fir d'Police weider z'entlaaschten, misst een administrativ Aarbechte weider verdeelen.

"An ee Punkt dovunner ass, fir dem Agent municipal méi Kompetenz ze ginn. Mat der adequater Formatioun. Och do si mer scho laang amgaangen um legislative Wee.“

Eng Kritik, déi an d'Richtung vun der Inneministesch Taina Bofferding goung. No den Avise vum Staatsrot vun 2018 hätt een an dësem Fall näischt méi héieren, esou den CSV-Deputéierten.