D'Gesondheetsministesch Paulette Lenert huet e Freideg um 14.30 en éischten, méi detailléierte Briefing iwwert déi rezent Covid-Fäll gemaach.

289 Fäll goufen et fir 49.388 Tester déi lescht Woch, dovunner 11% aus dem Large-Scale-Testing. An der Moyenne leie mer bei 19 Hospitalisatiounen den Dag. Iwwert déi lescht Woch gekuckt, haten 62% vun allen Nei-Infizéierte Covid-Symptomer.

„Interessant ass och. Do gesäit ee wierklech eng Steigerung. D'lescht Woch huet sech bestätegt, dass eisen Tracing wierklech gutt fonctionéiert a säin Sënn an Zweck erfëllt. Mir leien elo bei 57 Prozent kommen aus deenen eraus, déi mer virdru schonn identifizéiert haten als Kontaktpersounen.“

57% vun den neien, infizéierte Patienten koumen iwwerdeem aus dem Krees vu Kontakter a vu Persounen, déi sech ewell ugestach haten an detektéiert goufen.

Ze soen och, datt 90% vun den neien infizéierten Awunner aus dem Land sinn, déi aner 10% sinn Frontalieren.

Den Ament kéint een der LSAP-Ministesch no nach net vun enger exponentieller Hausse vun Neiinfektiounen schwätzen. D'Paulette Lenert hofft, datt de Chiffer vun enge 60 Neiinfizéierten den Dag en "Opflamen" ass, mee hofft och, datt d'Courbe ka flaach gehale ginn.

D'Zuele wieren awer wéi se wieren an dierften net schéi geriet ginn, sou d'Santésministesch, déi drop hiweist, datt een a 14 Deeg wéisst, ob d'Zuele weider unzéien oder explodéieren. Mee et ass een den Ament awer nach optimistesch am Ministère gestëmmt, datt een d'Situatioun vun der Pandemie am Grëff behält. Alles géif vum Behuele vum Eenzelen ofhänken. Dëst ass ëmsou méi vu Bedeitung, wëll déi meescht Leit sech nach ëmmer am private Kader ustiechen, also am klenge Krees vun der Famill oder de Frënn.

Déi meescht Infektioune kéimen net vu "risege Partyen", mee vun normale Fester oder Rencontere, mat Frënn oder mat der Famill. D'Paulette Lenert rifft d'Leit dozou op, d'Kontakter, wou déi 2 Meter Distanz net kënnen agehale ginn, wann et méiglech ass, ze limitéieren.

"Bei eis, wat opfält an dat ass wierklech dat, wat d'Charakteristik ass vun deenen Eenzelfäll, déi mer elo wierklech hunn, dat sinn éischter elo wierklech Zesummekommen, also einfach ganz banal kleng Familljen-Zesummekommen, mat Frënn zesummekommen, also dat ass wierklech de rouden Fuedem den Ament duerch déi relativ eparpilléiert Neiinfektiounen, wou een einfach d'Gefill huet, do muss iergendwou de Message komm sinn "mir sinn iwwert de Bierg", well der richteg grousser Partyen hunn mer elo net à la chaîne - Gott säi Dank. Et soll een einfach déi Kontakter, déi een mat Leit op manner wéi 2 Meter hutt, sou niddreg wéi méiglech halen. Dat ass nach ëmmer de beschten Wee, fir den Ament doduerchzekommen. Ech mengen, mir hunn natierlech elo vill jonk Leit, dat stëmmt. Mee dat heescht net, dass et just si sinn."

Als Beispill gouf och eng WG genannt, wou op enkem Raum 20 Leit an der Co-Locatioun beienee wunnen, an et e puer Fäll vun neien Infektiounen goufen.

„Ervirzehiewen ass e méi rezente Phänomen, wou mer elo d'Ausmooss nach net ganz kënne gräifen. Mir hunn zwou relativ gréisser Co-Locatiounen gehat, wou ëm déi 20 Leit awer op ganz enkem Raum zesummegewunnt hunn, wou och elo d'sanitär Konditiounen wierklech net optimal waren. Och mat Phänomen, wou der Leit haten, déi keng Securité sociale haten, och fir d'éischt elo Fäll, déi duerch déi Ëmstänn eben warscheinlech och schaffen gaange sinn, well se schwaarz schaffen. Dat heescht, do gi mer mat neien Problematiken confrontéiert, wou mer och mat deenen respektiven Autoritéiten elo Kontakt ophuelen. Mir hoffen, dass et do bei eenzel Fäll bleift. Mee do gesäit een natierlech direkt, dass et een Kontext ass, wou et méi schwiereg ass, Kontakter ze fannen, well d'Leit net direkt wëlle soen, wou se schaffen. Dat ass dann scho ganz opwänneg an do komme mer bëssen an eng sozial Problematik.“

D'Alters-Moyenne vun neien Infizéierte läit iwwerdeems bei nëmme 34 Joer. Bannent der leschter Woch si vum analogen Tracing-Grupp an der Santé 1.963 Kontakter vu Covid-positive Leit identifizéiert ginn. Dat sinn alles Persounen, déi wéi gesot Kontakt mat Positiven haten.

Donieft sinn 2 Residentë vun enger Struktur fir eeler Leit an der Stad betraff, awer kee beim Personal. Bei engem Altersheem am Süden ass ee vum Personal infizéiert.

Donieft huet den Direkter vum Statec Serge Allegrezza vun engem Bulletin "Flash-Covid" geschwat, deen de Statec all Woch wëll erausginn.