D'Robert Koch-Institut huet de Grand-Duché en Dënschdeg op d'Lëscht vun de Corona-Risikoregioune gesat.

Den däitschen Ausseminister Heiko Maas hat dem Jean Asselborn dat schonn e Méindeg annoncéiert, en Dënschdeg huet dat sech confirméiert, och wa Lëtzebuerg an de leschten Deeg ëmmer erëm drop higewisen huet, datt bei eis vill getest gëtt.

Extrait Jean Asselborn

Op enger Kaart ginn d'Inzidenze vun de leschte 7 Deeg pro 100.000 Awunner vu Lëtzebuerg an aneren EU-Memberstaaten ugewisen. Nieft dëse Länner ginn och Schengen-assoziéiert-Staaten, Groussbritannien an Nordirland hei opgelëscht. Vun dëse Länner ass Lëtzebuerg dat eenzegt mat iwwer 50 Fäll pro 100.000 Residentë bannent de leschte 7 Deeg a schneit domat am schlechtsten of.

Am beschte kommen Däitschland, Holland, Irland, Finnland, Dänemark, Italien, Ungarn, Slowakei, Litauen, Lettland, Estland a Griicheland ewech mat 0 bis 5 Fäll pro 100.000 Awunner an deem selwechten Zäitraum. Eis franséisch a belsch Nopere leie bei engem Schnëtt tëscht 5 an 10 Neiinfektiounen op déi selwecht Awunnerzuel gekuckt. Tëscht 25 a 50 nei Fäll melle Portugal a Schweden.

Residenten a Frontalieren ënnert den Neiinfektiounen zu Lëtzebuerg

De Robert Koch-Institut schreift, datt  d'Richtlinn bei 50 Fäll pro 100.000 Residentë vir. Hei ass awer ze bemierken, dass bei den Zuele vu Lëtzebuerg souwuel d'Residenten, wéi och d'Frontalieren, déi infizéiert sinn, mat aberechent ginn. Dës Approche géif d'Zuele fir de Grand-Duché zwar "verfälschen", ma mécht just ronn 10% vun den Neiinfektiounen aus, esou d'Gesondheetsministesch Paulette Lenert e Freideg op der Pressekonferenz.

Kommen nees Grenzkontrollen?

Et wier awer esou, datt an Däitschland eenzeg an eleng d'Zuel vun de positive Fäll zielt. Et hätt kee Wäert elo ze lamentéieren, mengt de Jean Asselborn, et géif elo drëms goen, eng nei Fermeture vun de Grenzen ze verhënneren.

De Jean Asselborn

D'Landesregierung vu Saarland a Rheinland-Pfalz sinn awer aktuell an trotzt den héijen Infektiounszuelen dogéint, dass nees Grenzkontrolle mat Lëtzebuerg gemaach ginn.

Vun der Lëtzebuerger Regierung gëtt den Appell gemaach, dass EU-wäit eng méi ofgestëmmten Approche misst bei den Zuele gefuer ginn. Änlech hat och den Ausseminister Jean Asselborn sech e Freideg geäussert.

De Lëtzebuerger Ausseminister huet recommandéiert, et d'selwecht ze maache wéi mat der Belsch: "dass een de Leit seet: 'Dir musst Iech un d'Dispositiounen halen, déi an Däitschland gëllen, selbstverständlech och un d'Dispositiounen halen, déi zu Lëtzebuerg gëllen.' Dat ass emol e Punkt, mengen ech, deen ass evident, mä vu Bundesland zu Bundesland sinn déi Ëmsetzunge vun den Dispositiounen, déi e Land huet, wann een Nopeschland als Risikoland agestuuft gëtt. Bon, do muss ee kucken wat do elo eraus kënnt. Ech kann Iech awer direkt soen, dass och déi Länner net op de Wee vun enger Quarantän wëlle goen, fir Leit, déi an Däitschland kommen".

Jean Asselborn iwwer Dispositiounen

Den Ausseminister réit awer, sech just an Däitschland ze deplacéieren, wann et onbedéngt néideg ass. Mir missten elo egal wéi eis Zuele an de Grëff kréien.

"Dofir géif ech mengen, dass an dëser Zäit, wou mer elo sinn, wou dee Peak do ass, dat muss net laang daueren, mä dass mer vläicht do och just an Däitschland reesen oder eis dohinner deplacéieren, wann et onbedéngt néideg ass. Ech hunn och gesot kritt, datt Leit, déi op Frankfurt op de Fluchhafe wëlle fueren, net heivunner betraff sinn. Et muss een also an dësem Ament och e wéineg 'wachsam' sinn an näischt iwwerdreiwen an dann ebe kucken, dass mer geschwë kënnen déi Korrekture virbréngen, déi mer musse virbréngen."

Jean Asselborn iwwer Deplacementer an Däitschland

Wéi reagéieren eis Nopesch-Bundeslänner?

An de regionale Medien a Rheinland-Pfalz an dem Saarland gouf en Dënschdeg vill iwwert méiglech Mesurë geschriwwen a spekuléiert. Am Laf vum Dënschdeg den Owend dunn hu béid Bundeslänner hir Recommandatioune via sozial Medien matgedeelt.

Lëtzebuerger Gesondheetsministesch reagéiert

D'Gesondheetsministesch Paulette Lenert, déi en Dënschdeg vum President Macron op Paräis invitéiert war fir d'Feierlechkeete vum "14. juillet" huet am RTL-Interview op d'Risiko-Lëscht reagéiert:

"Grenzen zoumaachen ass à ce stade keen Thema. Mir sinn no deenen objektive Krittären, déi nu mol de Robert Koch-Institut huet, an de roude Klassement eragerutscht. Dat kann een hinnen och net falsch maachen. Si applizéieren dat och intern bei sech, obwuel se intern verschidden Teststrategien hunn.

Wat wichteg ass a wat mer ëmmer nees ënnersträichen, ass, datt mir – an dat mécht Lëtzebuerg aus – e relativ groussen Deel vun Net-Residentë mat testen. Dat ass eppes, wou mer frou wären, wann deem géif Rechnung gedroe ginn."

Extrait Paulette Lenert

Wéini gëllt e Land als Risikogebitt?

Eng Regioun gëtt no enger gemeinsamer Analys an Entscheedung vum däitsche Gesondheetsministère, dem auswäertegen Amt, dem Inneministère an dem Ministère fir Heemecht a Bau op d'Risikolëscht gesat.

Fir als Risikogebitt aklasséiert ze ginn, mussen et an engem Land entweder an de leschte 7 Deeg méi wéi 50 Neiinfektiounen op 100.000 Awunner ginn oder et gëtt gekuckt, ob an engem Staat eng héich Infektiounsgefor besteet, och wann d'Zuel vun Neiinfektiounen ënnert dem nominale Grenzwäert leien.