Nach dës Woch, virun Allerhellegen, ginn d'Amendementer zum Covid-Gesetz gestëmmt.

Een Text, deen um Méindeg den Owend fir d'éischt an der Santés-Chamberkommissioun debattéiert gouf.

Haaptpunkte vun den neie Mesurë si jo d'Ausgangsspär vun 23 Auer un an eng nei Limitt, wat d'Beieneekomme vu Leit ubelaangt.

D'Gesondheetsministesch Paulette Lenert huet virun der Press Explikatioune ginn, notamment iwwert d'Zuel vun de Leit, déi dierfe beieneen sinn. Déi Zuel, déi jiddereen dobäi soll am Hannerkapp behalen, ass 4. Soubal een zu méi wéi 4 ass, gëllt Maskeflicht, egal ob dobannen oder dobaussen.

Tëscht 10 an 100 Leit kënnt nieft der Sëtzpflicht och eng Maskepflicht derbäi. Ausserdeem mussen 2 Meter Ofstand zu eneen agehale ginn. Dat wier eng duebel Sécherheet, fir d'Ustieche fundamental anzedämmen.

Et gëllt, wann d'Gesetz bis gestëmmt ass, och d'Zuel vun den 100 Leit, déi maximal an engem Restaurant toleréiert sinn - och do ginn et der Ministesch Paulette Lenert no keng Gro-Zonen.

Bei Sport- oder kulturelle Manifestatiounen zum Beispill gëtt Iessen a Gedrénks verbueden, fir weider Kontakter ze verhënneren. D'Event u sech soll am Mëttelpunkt stoen.

D'Paulette Lenert

An de Grandes-Surfacë mat iwwer 400 Quadratmeter gëllen dann och Limitte vun dann engem Client op 10m2.

D'Santés-Ministesch verstoppt net, dat alles muss gemaach ginn, datt et net zu engem kompletten Lock-Down kënnt. Kloer géif jiddwerengem vill ofverlaangt ginn, mä lo misst eng absolut Virsiicht gëllen, fir d'Courbe vun den Infektiouns-Chifferen nees méi flaach ze kréien. Wat der LSAP-Ministesch Angscht mécht, ass d'Donkelziffer. Duerfir och d'Zuel vun de maximal 4 Leit.

D'Paulette Lenert

D'Protokoller, fir Leit, déi mengen, datt se sech net sollten un d'nei Reegelen halen, ginn och an d'Luucht gesat vu minimum 25 Euro op 100 Euro a maximal 500 Euro.

Nach dës Woch ginn déi nei Mesuren an der Chamber gestëmmt - virdrunner muss de Staatsrot nach säi Feu Vert ginn. Fréistens ass dat en Dënschdeg de Fall.