Et war déi lescht Zeitung am Print nämlech vum „Lëtzebuerger Journal“. Vum 1. Januar 2021 u gëtt et de Journal just nach am digitale Format.

Eng weider Zeitung verschwënnt aus der Lëtzebuerger Mediewelt. No iwwer 70 Joer war et den 31. Dezember déi leschte geprinten Editioun vum Lëtzebuerger Journal. An Zukunft gëtt et de Contenu just nach digital. Och personell wäert sech sou munches änneren. De Pierre Jans huet mam fréieren Direkter an Chefredakter vum Lëtzebuerger Journal Claude Karger geschwat.

Eng leschte Kéier duerch déi fäerdeg Zeitung bliederen, déi een den Dag virdru mat vill Méi gefëllt huet. De Claude Karger war zanter 2005 Chefredakter.

Extrait Claude Karger

Eng 4.000 geprinten Exemplairë vum Lëtzebuerger Journal wäerten ënnert senger Leedung erstane sinn. Eng Ära geet op en Enn: ''Et ass natierlech e Gefill, wou ee vill Tréinen am Knapplach huet, zum Engem, well elo e Pabeiersproduit ophält, wou ech perséinlech awer iwwer 20 Joer vu mengem Liewen dran investéiert hunn, fir dee kënnen erauszebréngen. Dat ënnert ganz schwierege Konditiounen heiansdo a mat relativ wéinege Mëttelen'', esou de laangjärege Chefredakter.

Virop enger klenger Redaktioun. 8 Journaliste waren et zum Schluss. An der allerleschter Phase nach 4-5. Mëtt Juli koum d'Nouvelle: op Silvester kënnt déi lescht Printversioun vum ''Journal''. Et war awer en Enn, dat sech annoncéiert huet. Dat hat méi Grënn. Ëmmer manner Abonnenten, méi digital Konkurrenz. Den Accès zu – jo net ëmmer iwwerpréifter Informatioun - op de soziale Reseauen. A manner Pub, wéi de Claude Karger erkläert: ''Et deet den Zeitungen nach e bësse méi wéi, dass d'Annonceure mat hiren Offeren och vu gedréckten Annoncen op den Internet ginn. Dat heescht do si Recetten déi ewechfalen. Et ass schonn deier an et gëtt nach ëmmer méi deier fir Print-Produiten ze maachen.''

Fir de Lëtzebuerger Journal um Enn ze deier. Zanter de 60er Jore gouf d'Zeitung an der Imprimerie centrale gedréckt. Bis 2012 de Wiessel bei Editpress annoncéiert gouf.

Journalismus ass keen 8-Stonnen-Beruff. No 25 Joer ass de Claude Karger och midd. E géif elo e bësse raschten an duerno en neie Challenge an der Educatioun unhuelen.

Zesumme mat senger Nofolgerin Melody Hansen, der éischter Chefredactrice am ''Journal'' a nëmmen 28 Joer al, huet hien de Wiessel nach preparéiert. De Claude Karger gëtt der neier Ekipp mat op de Wee, ''dass se natierlech d'Antenne mussen erausfueren esou gutt wéi et geet, d'Aen an d'Oueren ophalen, fir Sujeten ze fannen.''

Ob Pabeier oder dann elo digital. Um Enn zielt dem Claude Karger no nämlech just de Contenu.