Dat sot den Educatiounsminister Claude Meisch bei der Presentatioun vun den Epreuves standardisées, déi all Joers am November gemaach ginn.

Duerch déi aussergewéinlech Situatioun hätt een duerchaus mat engem negativen Trend kënne rechnen, mee dee géif sech awer net weisen. Ënnert anerem déi Conclusioun gouf gezunn.

Den Antoine Fischbach vum Luxembourg Center for educational testing:

"Jo, et gëtt verschidde Perten, virun allem am Cycle 3.1 am Däitsch-Héier-Verstoen. Mee et ginn och Gewënn, wéi zum Beispill d'Meedercher aus den héije Klassen aus dem Secondaire, déi besser do stinn an de Sprooche wéi dat soss de Fall war"

Déi gutt Resultater wiere virun allem op den Engagement vun den Enseignanten, Elteren a Schüler zréck ze féieren, mee och op déi gutt digital Infrastrukturen déi en place ware sot den zoustännege Minister.

Meisch iwwer Epreuves standardisées
"Et ass e bessert Resultat, wéi mer eis erwaart hunn."

Allerdéngs wier och aus den Donnéeën eraus ze liesen, datt d'Kris déi vulnerabelst Schüler am meeschte getraff hätt an d'Schéier tëscht de Kanner déi soziokulturell favoriséiert an deenen déi benodeelegt sinn méi grouss gi wier.

"Déi aus sozio-ekonomesch méi schwaachen Elterenhaiser kommen, doheem vläicht keng vun de Schoulsprooche schwätzen oder am Secondaire , déi op méi niddrege Filièrë sëtzen, wou et grouss Problemer mat der Selbstorganisatioun gouf, déi elo an der Kris méi wéi jee gefrot war an der Schoul doheem."

Am Fundamental goufen et virun allem am däitsche Problemer, am Lycée an der Mathe. De Claude Meisch huet donieft annoncéiert, datt och dëse Summer erëm eng sougenannte "Summerschool" 2 Woche virun der Rentrée organiséiert gëtt, fir Retarden opzehuelen.