Dass matzen an Iechternach e Klouschterhaff aus der Zäit vum Willibrord begruewe kéint sinn, ass fir d'Archeologen an d'Historiker keng Iwwerraschung.

Zu Iechternach suergt de Willibrord den Ament fir ferm Opreegung! Hannert dem fréieren Hôtel La Petite Marquise, also direkt bei der Maartplaz, goufen Iwwerreschter vun engem Klouschterhaff aus dem 7. Joerhonnert fonnt, aus der Zäit also wou de spéideren Hellegen an der Abteistad gelieft a gewierkt huet. Wat fir d'Archeologen eng fantastesch Decouverte ass, gesinn anerer als Steng a Maueren, déi e Chantier onnéideg an d'Längt zéien. An esou ass et den Ament och nach net sécher, wat mam historesche Site wäert geschéien.

Wéi Enn 2017 de Bagger gerullt koum fir d'Schan vun Iechternach – wéi d'Petite Marquise dacks genannt gouf - ofzerappen, woussten d'Archeologe wuel dass do eppes am Buedem misst leien...dass si awer eppes esou Immenses, gutt Erhalenes géifen ausgruewen, huet d'Leit vum Centre National de recherche archéologique dann awer méi wéi positiv iwwerrascht! Responsabel fir d'Fouillen hei zu Iechternach ass d'Christiane Bis. Deen dee si begeeschtert nennt, ënnerdreift; d'Archeologin ass carrement aus dem Haischen: „Mir sinn hei an engem esou wichtege Beräich fir d'Iechternacher an d'Lëtzebuerger Geschicht, vun internationalem Niveau...dat einfach dem Bagger z'iwwerloossen, hunn ech perséinlech meng Schwieregkeeten.“

D'Kulturministesch weess och wat een hei fonnt huet...ëm déi historesch Valeur, d'Valeur fir Iechternach...wat mam Site soll geschéie wéilt si elo net eleng decidéieren, mee zesumme mat Buergermeeschter an Tourismusminister. D'Sam Tanson: „Ech hu eng Proposition de Classement un d'Gemeng gemaach, schonn eleng aus juristesche Grënn, dass se wësse wou mer dru sinn, an ech hunn och d'Cosimo saiséiert, d'Commissioun déi zoustänneg ass eng Evaluatioun ze maachen, vun deem historesche Fund, da musse mer kucke wat se soen, mee ech ginn dovunner aus, vu alles wat ech elo schonn héieren hunn, dass och si wäerten e positiven Avis fir d'Classement ginn.“

D'Christine Bis: „Ech ginn dovunner aus, dass d'Indice kloer genuch sinn, fir dass mer hei vum Iechternacher Klouschterhaff kënne schwätzen. Deen Haff huet zum Klouschter gehéiert mee deen däerf ee sech net als Bauerenhaff virstellen...dat war schonn eppes méi Dichteges. Den Historiker no misst dësen Haff vun Ufank un existéiert hunn, also do wou de Willibrord d'Klouschter gegrënnt huet an no deem wat mer hei fonnt hunn – d'Archeologie beleet dass dat klappe kann!“

D'Christine Bis, Responsabel fir d'Iechternacher Ausgruewungen, zielt vu Schierbelen déi fonnt goufen, vun Enn 7. Joerhonnert un, bis Mëtt 15.

RTL

© RTL

Mir stinn an, nee op enger Kichen, mat Bakuewen, mat Spueren och vum grousse Feier an Iechternach. De Willibrord muss der Irmina von Oeren, och nach Irmina vun Tréier genannt, nawell zimmlech gutt gefall hunn, well d'Madamm – iwwregens staamt de Karel de Groussen aus hirer Famill – déi Damm huet dem Willibrord nämlech Enn vum 7. Joerhonnert e Klouschter geschenkt: „Wann een et wëllt erhalen a weisen, muss een dat professionell a gutt maachen. Einfach nëmmen ze soen: ok, ech maachen eng Glasplack driwwer an da kënnen d'Leit jo kucken oder net – dat huet kee Wäert! Esou eppes brauch Entretien! Et kann een et net einfach esou loossen! Wann ech eng Zär driwwer paken, wiisst Gréngs do. Wann ech dat wëll verhënneren, muss ech et richteg iwwerbauen, mat de richtege Liichtverhältnësser...eng richteg Valorisatioun dovunner maachen. An da gëtt et e Point d'attraction!“

...dat wier, präziséiert d'Responsabel vun den Ausgruewungen zu Iechternach, Christiane Bis, hier perséinlech Meenung. Um Enn wier et d'Politik déi géing decidéieren.

Vum 7. Joerhonnert iwwer d'Fréi-Romanesch Zäit, a nach weider...hannert der Petite Marquise, ënner enger Couche ale Bauschutt, leie kleng Bijouen...jo, e Renk hu se och fonnt...mee dat war zimmlech sécher net dem Willibrord säin.