D'ASBL Valorlux huet vun en Donneschdeg un d'Consignë fir de bloe Sak geännert. Dës gëllen dann och elo fir d'Stad Lëtzebuerg.

Ännerunge bei Valorlux / Reportage Fanny Kinsch

Jughurtsbecheren, Blummendëppecher aus Plastik, Folien, Plastiksfilmer a Barquetten. Déi Offallproduite kann ee vum 1. Juli un och an déi blo Tut vun der Valorlux maachen. Dofir brauch ee keng nei Tuten, déi al gi mat den neie Produite mat ewech geholl. Bis ewell gouf et dee System ewell an engem Pilotprojet a 46 Gemengen, elo dann am ganze Land, respektiv quasi am ganze Land. Et hunn nämlech missen nei Konventioune mat de Gemengen ënnerschriwwe ginn, wéi den Direkter vu Valorlux Claude Turping erkläert.

Extrait Claude Turping

Dat ass relativ séier a relativ gutt gaangen. Mir hunn eng Lëscht op eisem Internetsite, wou mer d'Konventiounen dran hunn. Mir si Stand gëschter bei 97% vun de Gemengen. Dat heescht ganz no drun. Et feelt eis nach déi eng oder aner Konventioun, mir hunn awer vun alle Gemengen d'Zouso, datt se dru schaffen a staark interesséiert sinn.

Um Internetsite vun der Valorlux gëtt d'Lëscht mat de Gemengen déi matmaachen, permanent aktualiséiert. Den 1. Juli waren et nach déi gréisste Gemengen am Land, d'Stad Lëtzebuerg, Esch, Diddeleng an Déifferdeng, déi nach am ale System sinn.

Vun där Handvoll Gemengen, vun deenen eis d'Konventiounen haut feelen, huet keng eis gesot, dass se op kee Fall wéilte matmaachen. Au contraire, mir haten d'Fro nach ee mol nogestallt, si hu gesot jo natierlech, mir musse just an eiser Organisatioun, mir mussen eis administrativ Ofleef duerchkucken an da kritt dir d'Konventiounen ënnerschriwwen zréck.

RTL

© Valorlux

Beim Pilotprojet koum eraus, datt mat der erweiderter bloer Tut 37 Prozent méi Verpackungen agesammelt ginn. Op dat ganzt Land héichgerechent sollen dat 4.000 Tonnen ausmaachen. Verschidden Emballage bleiwen awer Tabu an der bloer Tut.

Mir musse verschidde Produkter aus där Sammlung ausschléissen. Déi sinn éischtens mol vun der Maschinn net erkennbar, an déi ginn dann an déi Fraktioun ofgewisen, wou se verbrannt ginn, oder net recycléierbar. Wat ass net recycléierbar, dat sinn zum Beispill sougenannte Komplex-Materialien, Chipstuten, déi bestinn aus Plastik a Metall, do gëtt et, menger Kenntnis no europawäit a weltwäit keng Méiglechkeet, déi Produkter ze recycléieren.

Och wann elo nach zousätzlechen Offall mat der bloer Tut gesammelt ginn, kann een déi al Tuten nach ëmmer weider benotzen, sou de Claude Turping.

Do brauch een natierlech keng nei Tuten, et hëlt een am beschten déi al. Déi muss een net zeréckbréngen oder ewechgeheien, déi fonctionéiere genee d'selwecht. Mir hunn natierlech déi nei Tute mat engem neie Logo mat där erweiderter Gamme, wou dat nach ee mol explizitt drop steet, ugepasst.

Ma déi al Tute géinge parallel nach ëmmer matgeholl ginn, sou den Direkter vun der Valorlux.

Op Nofro hin hunn d’Gemengen Déifferdeng an Esch matgedeelt, datt si elo schonn am Kader vum Pilotprojet hiren Awunner den erweiderte bloe Sak zur Verfügung gestallt hunn.

Déi nei Konventioun hätt ee just nach net ënnerschriwwen, well et nach Diskussiounen mat Valorlux iwwert den Traçage vun den Tute gouf. Et géif sech awer just nach ëm Deeg handelen. D’Gemengen hätte gär gehat, datt déi nei Tuten, wéi elo och schonn e Barre-Code hätten, fir se retracéieren ze kënnen. Et hätt een nämlech an der Gemeng gutt Erfarungen domadder gemaach. D’Leit hätten d’Tuten manner verbëtzt.

Zu Diddeleng iwwerdeems huet de Schäfferot de 7. Mee säin prinzipiellen Accord fir den neie System geet. Deemno steet hei dem neie System och näischt am Wee.

E Freideg huet dann och d’Stad matgedeelt, datt hir Bierger an d’Biergerinne vum erweiderte Service profitéiere kéinten. Et wier drop an drun, datt déi entspriechend Konventioun mat Valorlux géif ënnerschriwwe ginn.