Um drëtte Prozessdag, deen eigentlech hätt sollen dee leschte sinn, huet d'Affekotin vum Frank Engel vun engem "Putsch" géint hire Mandant geschwat.

Den Donneschdeg sollt eigentlech dee leschten Prozessdag an der Affär CSV-Frëndeskrees sinn. D’Affekote vun den Ugeklote sollten hir Plaidoirie maachen, an dono de Parquet de Requisitoire. Ma wéinst Verspéidunge goung d’Sëtzung eréischt iwwer eng Stonn méi spéit un - a gouf net fäerdeg.

Den Interessante Volet vum Prozess war dann, wéi et zu dem Avis juridique komm ass, mat deem de Frank Engel beim Parquet denoncéiert ginn ass. D’Affekoten hale fest, datt dësen net géing d’Strooss halen, an dat ganzt an hiren Ae keng Affär fir d’Strofrecht wier. Den Affekot, deen dëse verfaasst huet, kéint net all d’Fakte vun der Affär kannt hunn, sou d’Conclusioun. Hien hätt wuel ënner anerem net gewosst, dat de fréiere Parteipresident Frank Engel senger Missioun nogaange wier, an et kloer kee fiktiivt Aarbechtsverhältnes gewiescht wier, iwwert dat kee Bescheed wosst.

Drëtte Prozessdag an der Affär ëm den CSV-Frëndeskrees

D’Affekotin vum Frank Engel, d’Lydie Lorang, zeechent dann och d’Bild vun engem Putsch vun der Fraktioun géint den deemolege Parteipresident. Et wier wuel eng Angscht do gewiescht, datt hire Mandant vun der Basis kéint erëm gewielt ginn. Nëmmen esou wier och ze erkläerten, dat d’Denonciatioun zäitgläich un de Parquet an un d’Press gespillt ginn ass, datt alles séier genuch public wier. Schliisslech stoungen d’Kongresswale virun der Dier. "Et ass e Putsch, deen indigne ass, vun esou enger grousser Partei ", sot d’Lydie Lorang. "Ech si CSV-Member, ech sinn outragéiert."

Besser kommen da verschidde Fraktiouns-Memberen och net an de Plaidoyere vun den Affekote vun deenen aneren Ugekloten ewech. Besonnesch am Maître Daniel Baulisch senger Plaidoirie kënnt eriwwer, wéi wann déi Ugekloten als Baurenopfer hätte missen duerhalen, fir de Parteipresident lasszeginn. Op déi Leit, déi d’Denonciatioun ënnerschriwwen hunn, wier extremen Drock ausgeüübt ginn. "Top Juristen" an "intelligent Leit" wéi de Gilles Roth an de Léon Gloden hätten ënner anerem Leit, déi net Juriste sinn, gesot, si missten ënnerschreiwen. "Et muss ee sech d’Fro stellen, ob et net en Hannergedanke gouf, a Leit an d’Messer lafe gelooss gi sinn", sou den Daniel Baulisch.

RTL

Fir d’Verwaltung vun den Depense vun der CSV dann ze ënnersträichen, goung och vum Marc Spauz sengem Büro riets. Deen hätt jo och 20.000 Euro kascht a wier approuvéiert ginn, ouni e gréissere Gremium, deen do säin Avis ginn hätt. Keen hätt sech hei Froe gestallt.

Datt e Virement fir Soziallaaschten fir de Frank Engel gemaach gouf, wier zwar net Usus. Ma et hätt wuel nach ni e Parteipresident ginn , deen keen Akommes hat. Dëst wier eng Decisioun déi zesumme mam Tresorier getraff gi wier. De Bilan, mat deem Montant dran, wier jo och méi spéit vun der Partei guttgeheescht ginn, ënnersträicht de Mâitre Frank Rollinger.

D'Affekote vum Frank Engel, André Martins Dias, Georges Heirendt an Felix Eischen hunn de Fräisproch fir hir Cliente gefrot. Well net all d’Affekote vun den Ugekloten un d’Rei komm sinn, geet de Prozess en Dënschdeg de Moie weider.