D'Zuele vum éischten Trimester vum Statec weisen, datt och aktuell an der Kris d'Präisser vun den Immobilien am Grand-Duché weider eropginn.

D'Präisser um Lëtzebuerger Wunnmarché klamme monter weider. Am 1. Trimester dëst Joer gouf et eng Hausse vun 10,5 Prozent am Verglach mat virun engem Joer. Besonnesch Logementer, déi scho gebaut sinn, hunn u Wäert gewonnen. Iwwer 12 Prozent waren et bei den Haiser an 11 Prozent bei den Appartementer. De Präis vun neien Appartementer ass ëm 8,6 Prozent an d’Luucht gaangen.

Déi Haussë sinn nach ëmmer zolidd an awer net wéi zejoert am 1. Trimester. Do gouf et e Plus vun iwwer 17 Prozent, 2020 goungen d'Präisser ëm méi wéi 14 Prozent erop. Dat alles si Chifferen, déi de Statec publizéiert huet.

D'Präisser entwéckele sech och jee nodeem wat wou verkaf gouf. Um Land zum Beispill sinn d'Präisser méi niddreg wéi an der Stad. An am 1. Trimester dëst Joer war d’Nofro um Land méi grouss, wat d'Moyenne vum Präis fir de Quadratmeter fale gedoen huet. Wéi d'Tageblatt schreift, läit provisoreschen Zuelen no den Duerchschnëttspräis fir en Appartement zu Lëtzebuerg aktuell bei ronn 690.000 Euro.

D'Ventë sinn dobäi awer liicht réckleefeg, et goufe an den éischten 3 Méint vum Joer manner Logementer verkaf an och d'Zuel vun de Baugeneemegungen, déi ugefrot goufen, ass liicht zeréckgaangen.

E Mëttwoch war an der Chamber iwwregens iwwert de Wunnengsbau-Spezialfong debattéiert ginn, an deem all staatlech subventionéiert Wunnengsbau-Projete regroupéiert sinn. Um Enn 2021 waren dat eng 250 Projete mat eppes méi wéi 3.300 Wunnengen. De Staat wëll vu Joer zu Joer méi Mëttele fir de Bau vu Logement zur Verfügung stellen. Mëttelfristeg soll et eng hallef Milliard pro Joer sinn. De Logementsminister Kox gesäit dat och als en Investissement an d'Privatwirtschaft, schliisslech wier et déi, déi am Endeffekt géif plangen a bauen.