An der Nuecht op en Dënschdeg géint 3 Auer koum et zu Keel an der Rue du commerce zu engem Groussbrand an engem Appartementshaus.

RTL-Reporter vun der Plaz mam Buergermeeschter Jean Weiler

D'Police huet méi spéit en Dënschdeg matgedeelt, datt e 6 Joer ale Bouf beim Groussbrand ëm d'Liewe komm ass. De Jong war bewosstlos ginn, konnt och aus dem Gebai gebuerge ginn, ass awer méi spéit am Spidol gestuerwen. D'Police schwätzt vun 10 Blesséierten an engem Mann, dee mat schwéiere Verbrennungen an d'Spidol koum.

Wéi d'Pompjeeën op d'Plaz koumen, gouf et um éischte Stack vum Gebai e gréissert Feier. 5 Bewunner vum Appartementshaus hate sech op den Daach gerett. D'Rettungsekippen hu sech fir d'éischt drop konzentréiert, d'Persoune vum Daach ze evakuéieren, ier se sech op d'Sich no de weideren Awunner gemaach hunn. Parallel huet ee probéiert, d'Feier ze läschen, well et riskéiert huet, op zwee aner Gebaier iwwerzegräifen.

Interview mam Guy Bernard, dem Asazleeder vum CIS Keel

6 Familljen hunn hei am Haus an der Rue du Commerce gewunnt. 23 Leit waren hei ugemellt.

D'Aarbecht vun de ronn 80 Sekuriste war alles anescht ewéi einfach. Nieft 6 Lëtzebuerger Ambulanze waren der och zwou aus dem noe Frankräich als Renfort hëllefe komm.

Donieft gouf och e "lieu d'accueil des victimes indemnes" etabléiert, dat zesumme mam Groupe de support psychologique an der Gemeng Keel, fir no de ronn 30 Membere vun den implizéierte Famillen ze kucken.

Och nach laang Stonnen nom Feier bloufen d'Pompjeeën op der Plaz. D'sinistréiert Haus selwer ass net méi bewunnbar.

Bis elo ass net gewosst, wat den Ausléiser vum Brand war, wéi d'Police matdeelt. De Miess- an Erkennungsdéngscht soll dat elo erausfannen.