Ënnert wéi enge Konditioune kënnen Donnéeë gespäichert ginn am Beräich vun der elektronescher Kommunikatioun?

Wéi d'Justizministesch Sam Tanson e Mëttwoch de Moien op enger Pressekonferenz erkläert huet, gëtt d'Datespäicherung duerch en neie Projet de loi hei zu Lëtzebuerg elo zur Ausnam an net méi zur Reegel. De grousse Prinzip vum neie Gesetzestext wier et, déi generell an ondifferenzéiert Späicherung vun Trafic- a Standuert-Donnéeën ofzeschafen.

Datespäicherung vu perséinlechen Donnéeën/Claudia Kollwelter

D'Justizministesch:

"Et ass net méi sou, datt d'Donnéeën all ouni Differenzéierung kënne gehale ginn. Et sinn Exceptioune virgesinn, konform mat deem, wat an der europäescher Jurisprudenz festgehale gëtt. Verschidden Donnéeë kënne gehale ginn, mat Delaien. D'Identifikatiounsdonneën an d'IP-Adresse kënne gehale ginn, ondifferenzéiert. Exceptioune si méiglech ënner strikte Konditiounen a fir spezifesch Kategorië vun Donnéeën."

Domat dréit een der Jurisprudenz vun der Cour de justice vun der Europäescher Unioun Rechnung. Konkret heescht dat, datt d'Telefonsoperateuren d'Metadonnéeën net méi all einfach esou späicheren dierfen. D'Späichere gëtt méi streng encadréiert a méi geziilt gemaach. Fir spezifesch Kategorië vun Donnéeë ginn et am Text Exceptiounen.

Et géif der Ministesch no drëm goen, en Equiliber ze schafen. Déi national Sécherheet misst garantéiert ginn an et muss ee géint schwéier Kriminalitéit kënne virgoen, mee och d'Rechter vun de Bierger musse weider geschützt ginn. D'Sam Tanson bedauert iwwerdeems, datt ee keng eenheetlech europäesch Reegelung fonnt huet, ma d'Meenunge vun de Memberstaate wieren einfach ze vill wäit auserneen.