Däitsch Frontaliere sollen an Zukunft kënne bis zu 40 Prozent am Télétravail schaffen an trotzdeem weider hei an der Sozialversécherung bleiwen.

Petitioun Homeoffice / Fanny Kinsch

Zwee Deeg Homeoffice d'Woch fir jiddereen, dat war d'Fuerderung vun enger ëffentlecher Petitioun, déi e Mëttwoch de Moien an der Chamber debattéiert gouf. D'Petitioun 2384 hat knapp 14.000 Ënnerschrëfte kritt, déi zweetmeescht bis elo. An och wann d'Petitionärin net op alle Punkte Satisfaktioun krut, goufen et awer Annoncen an hirem Sënn, wat d'Sozialversécherung ugeet.

D'Méiglechkeet fir jiddereen, zwee Deeg Télétravail ze maachen, egal wou ee wunnt, wier gutt fir d'Attraktivitéit vum Standuert Lëtzebuerg, fir déi sozial Kohesioun am Betrib an och fir d'Ëmwelt, esou d'Katia Sabrina Litim. Enger Etüd vum Wirtschaft- a Sozialrot no kéinten duerch zwee Deeg Homeoffice méi wéi 17 Milliounen Trajeten hin an zréck d'Joer agespuert ginn.

"Si on estime que 50 pourcent de ces trajets se font en partie ou totalement en voiture, sur une distance moyenne discutable de 20 kilomètres, cela représente sur un an 35 kilotonnes de CO2 pour deux jours de télétravail par semaine, soit l'équivalent de plus de 20.000 aller-retours Paris-New York."

D'Petitionärin huet gefuerdert, datt nei Steierofkommes mat deenen dräi Nopeschlänner ofgeschloss ginn, déi réckwierkend op den 1. Januar dëst Joer a Kraaft trieden, datt e Recht op Télétravail agefouert gëtt an datt méi Efforte gemaach ginn, fir eng Léisung bei de Cotisatiounen ze fannen. Op deem leschte Punkt wier ee viru komm, sou de Sozialminister Claude Haagen.

"Dat ass och op engem gudde Wee a mir wäerten och par Rapport zu Däitschland vun deene 25 Prozent op 40 Prozent goen. Ech denken, datt mer do den Accord finaliséiert hunn, ech schwätze Securité sociale, am éischte Semester 23. Dat heescht, ech hoffen, datt dat am Juni dann déngfest ass."

D'Belsch wier och deemno wéi bereet, op dee Wee ze goen, wa keng Léisung um EU-Niveau kéim. Mat Frankräich wiere schonn technesch Diskussiounen awer nach keng bilateral Gespréicher. D'Petitionärin Katia Sabrina Litim huet sech nom Debat éischter zefridde gewisen.

"Au niveau fiscal on comprend que c'est un peu compliqué, là c'est un peu décevant de ne pas avoir de nouvelles informations positives sur le sujet, mais on espère que ce débat va relancer les discussions avec nos partenaires de la grande région et peut-être aussi que nos 14.000 signataires vont aussi faire pression à leur manière dans chacun des pays concernés, pour que les pays de la grande-région soit plus favorable à des accords."

Fir qualifizéiert Aarbechtskraaft unzezéien, wier et interessant, an dësem Beräich eng Flexibilitéit z'erméiglechen. Dat huet iwwerdeems den Aarbechtsminister Georges Engel an der Chamber confirméiert. Dat wieren och d'Echoen, déi ee vum Terrain kréich.