Nieft Iwwerwaachungskameraen op sensibele Plaze solle méi Police-Patrullen am Zentrum Presenz weisen an d'Sécherheetsgefill bei den Escher verbesseren.

Déi lescht Méint iwwer huet d'Police sech genee ugekuckt, wéi eng Strofdoten op wéi enge Plaze festgestallt goufen. Genee op déi Plaze sollen d'Patrulle verstäerkt ginn.

Donieft sollen och Kameraen hëllefen, fir d'Kriminalitéit an de Grëff ze kréien. Op aacht Plaze soll eng Video-Iwwerwaachung installéiert ginn, dorënner d'Uelzecht-Strooss, Brill-Plaz an d'Gare.

Wann et der Gemeng no géing goen, géingen d'Kamerae scho muer opgehaange ginn, seet den Escher Buergermeeschter Georges Mischo.

Et muss een allerdéngs nach d'Autorisatiounen aus dem Ministère fir bannescht Sécherheet ofwaarden. Ugangs 2024 kéinten d'Kameraen zu Esch dann a Betrib geholl ginn.