De Premier Luc Frieden stoung Ried an Äntwert an eisem Neijoerschinterview
Den traditionellen RTL-Neijoerschinterview huet missen, op ausdréckleche Wonsch vum Luc Frieden, schonn den 18. Dezember opgeholl ginn.
Grond fir d'Virzéie vum Interview ass eng kleng Interventioun, déi un der Nues vum Premier misst gemaach ginn.
"Déi nächst zwee Joer gi schwiereg", sou den neie Premier am Neijoerschinterview an dofir missten Aiden an Zukunft och méi sozial selektiv ginn. No wéi enge Krittären, dat misst awer nach gekuckt ginn, et kéint een net einfach soen, ab deem Gehalt wier een "en Décken". Bis Mëtt des Joers géingen awer d’Aiden am Ëmweltberäich mol d’selwecht bleiwen.
De Klimawandel wier eng Realitéit, mee do hätt een awer méi Zäit fir ze handelen, wéi bei aneren akute Krisen, wéi dem Logement zum Beispill. Et misst een dat mat der Urgence vum Klimawandel méi entspaant gesinn, op nei Technologien hoffen, déi all ze grouss Changementer an onsem Liewensstil onnéideg géinge maachen. Och fossil Energië géingen nach weider eng wichteg Roll spillen, op si kéint ee sou bal nach net verzichten, och Atomenergie huet de Premier an dem Zesummenhang genannt.
Am Gespréich geet et virop ëm déi grouss Erausfuerderunge fir déi nei CSV-DP-Regierung, wéi a wéini Walverspriechen am Logement oder de Steieren zum Beispill ëmgesat gi wäerten a wat dem Luc Frieden seng eege politesch Prioritéite sinn.
Eng dervu si ganz kloer d’Pensiounen, am Walkampf zwar net vill thematiséiert, mee d'Diskussioun net ze féiere wier feig, esou de Premier, fir deen onse System grondleeënd misst hannerfrot ginn "wéi wa mir guer kee System hätten, fir d'Zukunft vun onsem Land ofzesécheren". Dofir wëll de Luc Frieden och eng ganz breet Debatt iwwert den aktuelle Pensiounssystem féieren, deen ons jo och zu konstantem Wuesstem géing zwéngen.
Net ännere wëll hien dogéint onse Walsystem mat de 4 Bezierker, soss wier et méi schwéier fir Politiker aus dem ländleche Raum gewielt ze ginn, d’Bezierkslogik beim Besetze vun de Regierungsposte wier dogéint scho problematesch. All Partei hätt seng Ministeren eleng erausgesicht, nodeem sech CSV an DP eens waren, wie wéi eng Ressorte kréich, fir déi chrëschtsozial Ministeren hätt hie ganz bewosst just nei Gesiichter eraus gesicht, eppes wat villäicht net jiddereen an der Partei verstanen hätt, mee fir mat deem Geschéck däitlech ze maachen, dass et net just den "neie Luc" ass , mee och eng nei CSV.
A wéi gesäit de Luc Frieden seng eege Roll an der Regierung? Hien assuméiert ganz kloer de Chef ze sinn, huet och wëlles an de wichtegen Dossiere selwer mat derhannert ze bleiwen, all Minister krut kloer den Optrag, fir a senge Ressorten ze kucken, wou ee Prozedure méi einfach a méi séier kéint maachen. Déi "Simplification Administrative" wier néideg fir e moderne Staat, e Staat, deen hien och net zéckt mat enger Firma ze vergläichen.
"Ech fannen, datt de Premier ass wéi de Generaldirekter an engem Betrib, dee muss kucken, dass déi eenzel Direkteren an den Departementer an eng Richtung zéien an déi Koordinatiounsaarbecht fir derfir ze suergen, dat wier eben déi vum Premier."
"Neie Luc" hin oder hier, an der Migratiounspolitik assuméiert de Luc Frieden prinzipiell déi selwecht Politik, wéi als fréiere Justizminister: bleiwen däerfe just déi, déi Recht op Asyl hunn, all déi aner misste méi séier zréck gefouert ginn, och déi kéimen, well se just e bessert Liewe wéilten, si missten et eben iwwert de legale Wee versichen.
Seng nei Aufgab mécht dem Luc Frieden offensichtlech immens vill Freed, un der néideger Motivatioun d'Erausfuerderungen unzegoen, feelt et him all Zäit net.
