E Mëttwoch de Moien hunn nieft den Deputéierten an der Chamber och d'CGFP an de Mouveco op dem Premierminister seng Ried zur Lag vun der Natioun reagéiert.

D'Staatsbeamtegewerkschaft kritiséiert virop den Hausse vun de Cotisatiounsjore fir d'Pensioun.

Wann d'Cotisatiounsjore progressiv eropgesat ginn, wiere besonnesch déi méi jonk Generatioune concernéiert. Si misste sech elo schonn drop astellen, méi laang schaffen ze goen. D'CGFP vermësst aner Optioune wéi alternativ Finanzéierungsquelle fir d'Pensiounskeess.

D'Annonce vum Premier géif och confirméieren, dass d'Reformpläng scho laang prett gewiescht wieren. Déi wochelaang Debatten hätten nëmmen eng Alibi-Funktioun gehat. An et géif och weisen, datt der Regierung de Sozial-Dialog zimmlech egal wier.

Weiderhi kritiséiert d'Staatsbeamtegewerkschaft, dass weider wichteg Sujete wéi d'Steierreform oder d'Logementsproblematik an der Deklaratioun ze kuerz komm wieren.

Hausse vu Cotisatiounsjore gëtt och vun der Staatsbeamtegewerkschaft kritiséiert
Fir d'CGFP ass kloer, datt et déi jonk Generatioune sinn, déi dat am meeschten ze spiere kréien, sou hire Generalsekretär Steve Heiliger.

Kritik och vum Mouvement Ecologique

De Mouveco kritiséiert iwwerdeems, datt de Premier beim Finanzéiere vun der Energietransitioun an de soziale Leeschtunge praktesch exklusiv op de Wuesstem géif setzen. Eng nohalteg Politik géif anescht ausgesinn.