E Schreiffeeler am franséische Buch vun de 7e-Klasse vum Enseignement secondaire général huet dofir gesuergt, datt verschidde Bicher mussen ersat ginn.

Ënner anerem ass am Franséischbuch mam Titel "Imagine Luxembourg", dat fir d'7G-Klassen gedréckt gouf, e Schreiffeeler dran, deen ëmmer nees optaucht. Amplaz vun "Activité Orale", also eng mëndlech Aufgab, bei deenen d'Schüler schwätze solle léieren, ass op verschiddene Säiten dës Aufgab mat "Activité Anale" beschriwwen. Dëst wier awer net den eenzege Feeler, deen an dësem Buch ze fannen ass, krut RTL vu Leit aus dem Secteur gesot.

"Et handelt sech ëm Erreurs d’impression am Franséisch-Buch 'Imagine' fir d’7e-Klassen vum Enseignement secondaire général," heescht et aus dem zoustännege Ministère. Bei der Réimpressioun vun de Bicher wieren dës Feeler entstanen, wuel duerch technesch Problemer beim Éditeur. De Problem wier dem Schoulministère no eréischt opgetrueden, nodeem de Script, dee fir d'Schoulbicher zoustänneg ass, den Ok ginn hat, datt d'Buch an den Drock ka goen..

"Déi opgetruede Feeler sinn inakzeptabel an hu keng Plaz an engem Schoulbuch. Op Opfuerderung vum Ministère zitt den Editeur, deen eleng fir dëse Mëssel responsabel ass, all déi betraffe Bicher direkt zeréck an ersetzt se," präziséiert nach d'Spriecherin vum Ministère Myriam Bamberg. Wéini genau d'Bicher all ersat ginn, kann een aktuell nach net soen. Den Editeur hätt sech awer engagéiert, dëst "esou séier wéi méiglech" ze maachen.

© RTL Mobile Reporter
© RTL Mobile Reporter
De Feeler mat der "Activité Anale" taucht ëmmer nees an de betraffene Bicher op. / © RTL Mobile Reporter
An de betraffene Lycéeë ginn d'Bicher aktuell all agesammelt. / © RTL Mobile Reporter
Les photos diffusées sur ce site sont soumises à des droits d’auteurs et ne peuvent être copiées, modifiées, vendues, sans l’autorisation préalable du propriétaire du site en question.

Well d'Verantwortung fir dësen "inakzeptabele" Feeler ganz eleng beim Editeur läit, well d'Fiche vum Script dëse Feeler net dran haten, préift de Ministère aktuell, ob ee rechtlech Schrëtt géint den Editeur an d'Weeër wäert leeden.

Betraff sinn d'Bicher vun der Editioun 2025, déi nogedréckt hu misste ginn (ISBN 9782278111725).

"En attendant, datt d’Bicher nei gedréckt a geliwwert ginn, stellt den Editeur alle betraffe Schüler an Enseignanten en Accès op déi digital Versioun vum Buch zur Verfügung", präziséiert de Ministère nach. Kopien un d'Schüler auszedeelen, wier an dësem Fall och eng Alternativ, "bis déi nei Impressioun do ass". Am Ministère geet een aktuell dovunner aus, datt dëse Feeler awer keen negativen Impakt op den Unterrecht huet.