Ronn annerhallef Woch no der Publikatioun vum UNO-Wëssenschaftsconseil sengem Rapport iwwert den Zoustand vun der Biodiversitéit hunn am spéide Freideg de Moien och 5 Lëtzebuerger Institutiounen an Associatiounen Alarm geschloen.
Och am Grand-Duché géif zum Beispill d'Zuel vu Planzen, Villercher an Insekten zréckgoen, dofir misst eise Gesellschafts- a Wuesstemsmodell a Fro gestallt ginn, huet et am Naturmusée geheescht.
No dësem Rapport géif et keng Ausried méi ginn, an och wann et eng kollektiv Verantwortung gëtt, misst d'Politik awer de Kader fir Changementer setzen.
E war alarmant, dee rezent vum UNO-Wëssenschaftsconseil publizéierte Rapport iwwert den Zoustand vun der Biodiversitéit: Dora stoung, dass weltwäit iwwer eng Millioun Planzen- an Déierenaarten a Gefor sinn. E Freideg hu 5 Lëtzebuerger Institutiounen an Associatiounen op dee Rapport vun 1.800 Säite reagéiert a betount, dass d'Situatioun am Grand-Duché net onbedéngt besser ass. De Guy Colling aus dem Naturmusée huet d'Beispill vun de Planze genannt; ëmmerhi wär iwwer en Drëttel vun der Flora bei eis a kengem gudden Zoustand:
Am Rapport vum UNO-Wëssenschaftsrot stinn och Konklusiounen, sou d'Blanche Weber, Presidentin vum Mouvement écologique. Dobäi gëtt eise Gesellschafts- a Wuesstemsmodell a Fro gestallt:
De Jacques Pir vum Mouvéco huet ervirgehuewen, dass all Dag 140 bis 180 Liewewiese verschwannen; d'Grënn dofir ginn am Rapport genannt:
Och zu Lëtzebuerg wär e Bewosstsi fir dës Dramatik néideg a wäre Moossnamen z'ergräifen, huet et e Freideg nach geheescht.
