E Freideg war de fréieren CSV-Deputéierten den Invité vun der Redaktioun.

„Mat engem A kräischen ech, mat dem anere laachen ech“, seet de Paul-Henri Meyers, fréieren CSV-Deputéierten a Papp vun der Verfassungsreform. Hie war e Freideg de Moien eisen Invité vun der Redaktioun.

Kräischen...well eng richteg Reform néideg gewiescht wär a laachen, well een awer aus dem Lach eraus ass, wou ee virum Summer era gerode war. Ëmmerhin gëtt awer reforméiert, seet de Paul-Henri Meyers.

Wéi konnt et sou wäit kommen?, dat hätt hie sech och gefrot, besonnesch well ee sech nach am Juli wéi et schéngt eens war.

Wéi dat alles gelaf wier, wie wéini blockéiert hätt, dat kéint hien net soen. Hie wier net méi no genuch derbäi, fir ze soe wie Recht hätt, warscheinlech hätt jidderee Recht.

D'CSV-Revendikatioun vun engem eenheetleche Referendum kéint hien zum Deel novollzéien, notamment beim Thema eenheetleche Walbezierk. Dës Fro hätt awer sollen entkoppelt gi vun der neier Verfassung.

20 Joer laang huet de Paul-Henri Meyers wéi gesot un der Verfassungsreform geschafft... consultéiert wier hien elo net vu senger Partei ginn. Hien hätt zwar mat de Kolleege geschwat, och mam CSV-Parteipresident, ma an deene Gespréicher wier et awer net an de Fong gaangen.

An der Plaz vun der komplett neier Verfassung soll elo op 30 Punkten nogebessert ginn. De Paul-Henri Meyers recommandéiert, fir sech op déi Texter ze baséieren, bei deenen an de leschte Joren e Konsens fonnt gi war.
Ob d'Zuel vun de viséierten Artikelen duergeet, wéisst hien net. Am Laf vun der Zäit kéint sech eraus stellen, datt Changementer vun Artikelen och Changementer op aner Plaze géingen néideg maachen, wann um Enn e koherenten Text soll raus kommen.

Wesentlech Punkten, déi fir de Paul-Henri Meyers missten an d'Verfassung integréiert ginn, sinn den droit de succession au trône an d'Relatiounen tëscht Chamber a Regierung.

De Referendum iwwer d'Verfassung war ëmmer eppes wéi e Geescht am Hannergrond, sou de Paul-Henri Meyers.
Wann elo kee Referendum kënnt, ass déi Angscht fort an da kéint jo lo geschafft ginn.

Wann de President vun der Institutiounekommissioun Alex Bodry elo an de Staatsrot wiesselt, wier et eng gutt Fro, wéi et mat den Aarbechten an där Chamberkommissioun weider geet.

Dem Paul-Henri Meyers falen d'Nimm vun den LSAP-Politiker Franz Fayot a Mars di Bartolomeo an, fir do d'Relève ze iwwerhuelen

Invité vun der Redaktioun: Paul-Henri Meyers

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.