En Donneschdeg de Moie war den neien Direkter vum Fonds du Logement eisen Invité vun der Redaktioun.

De Fonds du Logement ass weider amgaangen, sech ze moderniséieren. Viru 5 Joer war en hallef sou grouss. Et hätt een haut eng nei Struktur. Den Direkter Jacques Vandivinit war um Donneschdeg de Moien eisen Invité vun der Redaktioun. Zanter September ass hien op deem Posten.

Ganz wichteg ass fir de Jacques Vandivinit déi sozial Roll vum Fong. De Logements-Problem wier bekannt an et misst elo weider no Léisunge gesicht ginn.

An den nächste 5 Joer wëll de Fong 600 Logementer bauen, eng 100 bis 125 Wunnengen d'Joer. Dono komme grouss Projete bäi wéi „Nei Schmelz“ zu Diddeleng oder „Wunne mat der Wooltz“. Fir iwwer 4.000 Wunnengen an den nächsten 10 Joer wëll een als ëffentleche Bauträger suergen. Natierlech géing dat net duer fir de Besoin ze decken, mä de Fonds du Logement wier jo net den eenzegen Acteur. Dat Wichtegst wier hei, datt bezuelbare Wunnraum schafen eng Prioritéit ass.

Den Ament sinn 3.000 Stéit op der Waardelëscht, déi wär méi grouss ginn, seet de Jacques Vandivinit. Ëmmer méi Leit, och Leit aus der sougenannter Mëttelklass, fannen näischt hei am Land. D'Wunnengspräisser sinn enorm geklommen.

Viru ronn engem Joer war public ginn, datt de Fonds du Logement d'Affer vun engem Bedruch gouf. Sue waren op falsch Konten iwwerwise ginn.

De Gros vun den 850.000 Euro hätt ee recuperéiert, sou den Direkter vum Fong. 150.000 - 170.000 stinn nach op. Hie kéint wéinst dem Secret de l'instruction net méi soen, mä hie wär awer optimistesch, datt een déi Suen och nach zréck kritt.

Invité vun der Redaktioun: Jacques Vandivinit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.