En Donneschdeg war de President vun der Doktesch-Associatioun den Invité vun der Redaktioun.

Fir de Virus gëtt et keng Grenzen, ma och wann elo de Grand-Est méi concernéiert ass, sou géing och dat elo näischt weider änneren. De Corona wäert sech weider verbreeden, sou den Dr. Alain Schmit vun der AMMD. Hie war um Donneschdeg de Moien eisen Invité vun der Redaktioun.

D'Autoritéite wären och gutt genuch virbereet gewiescht. Déi aktuell Ausmoossen hätt een och net anescht kéinten opfänken, well d'Situatioun einfach eng aner Nues géing kréien, wa se vu China endlech hei an Europa ukënnt.

Wat d'Reprochen vun der Patientevertriedung an der Nomenklatures-Kommissioun ugeet, sou ass den Dr. Alain Schmit ganz däitlech. D'Patientevertriedung wär e Club fermé, also net oppe fir all Mënsch, ma een OGBL-U-Boot, gesteiert vum President René Pizzaferri. D'Ausso, dass et den Doktere just géing ëm d'Geld goen, wär natierlech net richteg.

A punkto Gesondheetsdësch wären déi wichteg Bausteng geluecht ginn: also wéi Dokteren ënnertenee schaffen an a Relatioun mat Spideeler an ambulante Strukturen an natierlech wéi accessibel dës Strukture fir Patiente sinn. D'Iddi fir ambulant Strukture géing gutt opgeholl gi vun den Partneren ronderëm de Gesondheetsdësch.

Den President vun der AMMD war och formell: et géing hei net ëm eng Kommerzialiséierung vun der Medezin goen, mä dorëm eng besser a méi séier Offer fir Patienten ze schafen.

Invité vun der Redaktioun: Dr. Alain Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.