E Méindeg de Moie war e Generalist den Invité vun der Redaktioun.

Am Ufank vun der Epidemie war et esou, dass d'Tester just vum Staatslabo gemaach goufen. Elo sinn d'Privatlaboen och nogezunn a bidden Tester un. Et mécht awer kee Sënn, wa Leit ouni Symptomer Tester maachen, sou de Generalist  Dokter David Heck. Hien war e Méindeg de Moien eisen Invité vun der Redaktioun.

Negativ Frottisen kéinten dann eng falsch Sécherheet ginn. Zum Beispill wa se falsch ausfalen a sech dann eng Woch drop Symptomer weisen, da kéint d'Persoun ebe mengen, si hätt net den Covid-19 mä eng normal Gripp an dat ass net ideal, sou den Dokter.

D'Prioritéit wär och net, fir duerch Tester aktuell Zuelen ze hunn, mä fir déi vulnerabel Leit ze schützen. Also Leit déi krank sinn, sollen doheem bleiwen, fir anerer net unzestiechen. Also ass et net relevant, fir dass déi Leit sech deplacéieren, fir Tester ze maachen.

"D'Evenementer iwwerschloen sech permanent. Mir kruten een Samschdes Owend aner Consignen wéi nach e Freideg de Moien, dat ass natierlech schwiereg", sou nach Dokter, deen awer versteet, dass et an dëser Zäit net anescht méiglech ass.

An Zukunft sollen an de Maisons medicales Patienten, déi de Coronavirus an d'Gripp hunn, am Dag behandelt ginn. Hei stelle sech awer nach eng ganz Partie Froen. Zum Beispill, firwat et net an enger grousser Sportshal gemaach gëtt, mä d'Leit op engem klenge Raum rassembléiert ginn. An och wéi d'Gestioun dovunner soll gemaach ginn, mat Bléck op d'Penurie vun de Generalisten. Et riskéiert een och, datt Leit, déi nach net mam Coronavirus infizéiert sinn, mä d'Gripp hunn, sech och mam Covid19 kéinten ustiechen.

Krankeschäiner dann. Do missten d'Doktere sech un d'Gesetz halen, a just déi krankschreiwen, déi och wierklech Symptomer hunn. Eleng Risikopatient ze sinn, géif net duergoen. Dofir géif een elo op weider Instruktioune vun der Krankekeess waarden.

Invité vun der Redaktioun: Dr. David Heck


Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.