En Dënschdeg de Moie waren de President an de Vizepresident vun der AMMD d'Invitéë vun der Redaktioun.

D'Cabinete vun den Doktere ginn an de Spideeler zougemaach. Déi aner Cabinete bleiwen accessibel fir déi Leit, déi dréngend versuergt musse ginn an dat och mat hirem Dokter ofgekläert hunn.

Fir z'evitéieren, dass Cabineten iwwerlaf ginn, sollen d'Dokteren op Télémedezin zeréckgräifen, sou den President vun der Dokteschassociatioun AMMD, den Dokter Alain Schmit.

Hien an de Vizepresident vun der AMMD, den Dokter Philippe Wilmes, waren en Dënschdeg de Moien eis Invitéë vun der Redaktioun.

D'Situatioun wär insgesamt schlëmm. Mir hunn eng sanitär Krise wéi mir nach ni eng haten. Mir brauchen eng kloer Strukturatioun vun der Spidolsmedezin, eng Re-Strukturation an eng Strukturatioun vun den ambulanten Fluxe vun de Patienten, sou den Dr. Alain Schmit.

Et géing drëm goen eng Grondversuergung oprecht z'erhalen an op der anerer Säit d'Leit net an e Risiko ze bréngen. Wat genee mat der Restrukturatioun gemengt ass, erkläert den Dr. Philippe Wilmes.

„Et ass wichteg, dass mer eis Ressourcen an déi wichtegst Ressourcen an de Spideeler, dat sinn d’Soignanten an d’Dokteren, dass mer déi elo menagéieren. Den erwaarten Héichpunkt vun den Krankheetsfäll ass jo eréischt an 10-14 Deeg a bis dohinner mussen mer dofir suergen, dass eist Personal an eis Dokteren net krank ginn an ze fréih ausfalen, wann dann e groussen Deel vun de Patienten muss versuergt ginn. Dofir sinn mir amgaangen d’Dokteren an verschidde Gruppen opzedeelen. Déi di direkt mat Covid-Patienten a Kontakt kommen an déi ze behandelen an déi di di normal Urgence mussen Oprecht erhalten an déi awer och bei Bedarf an den aneren Grupp kënnen wiesselen. An mir schaffen och drun fir Deeler vun de verschiddene Gruppen kënnen a Reserve ze schécken spréch heem ze schécken an se eréischt an 14 Deeg z’aktivéieren, wann et muss sinn.“

An de Spideeler schaffe ronn 1000 Dokteren am ganzen Land an déi muss richteg opgedeelt ginn an zum néidegen Zäitpunkt agesat ginn. Dat si Planungen déi an de Spideeler lafen, fir d'Grondversuergung Oprecht z'erhalen, sou nach den Dokter Philippe Wilmes.

Invité vun der Redaktioun: Alain Schmit a Philippe Wilmes


Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.