E Mëttwoch de Moie war de Generalsekretär vun der Handwierkerfederatioun eisen Invité vun der Redaktioun.

Mir fäerten, datt mer d'Zäit net packen, wann net Suen an de Grapp geholl ginn. Vill Betriber bräichten direkt Hëllefen, seet de Generalsekretär vun der Handwierkerfederatioun, de Romain Schmit. Hie war e Mëttwoch de Moien eisen Invité vun der Redaktioun.

Hien hätt Patronen um Telefon, déi kräischen, déi net méi wéisste wéi et weider geet. De Romain Schmit hofft, datt d'Regierung unbürokratesch bei de Mesuren nobessert.

Mir hate bis gëschter gemengt, mir kéinten nach eng Zäit sou weider fueren, mä elo musse mer d'Chantieren zoumaachen.

Et ass net, datt mer et net agesinn, seet de Romain Schmit, mä et stelle sech vill Froen. Et wéisst ee jo net, wéi et weider geet.

Hie rechent dermat, datt dëst Joer zwee Méint kee Chiffre d'Affaires ka gemaach ginn.

Nach si mer net am Lockdown, mä mir hätte villäicht léiwer gehat, alles wär gestoppt ginn, well vill Betriber wëssen net wou se dru sinn. Betriber sinn an hirem Effektiv esou geschwächt, datt se souwisou keen normale Service méi kënnen offréieren, sou de Romain Schmit. Also och Betriber, déi nach dierften op hunn, maachen zou, well et net méi geet.

Am Handwierk ass dacks keen Télétravail méiglech, eng Heizung flécke geet net iwwer Telefon oder den Internet.

Et misst ee villäicht och versiche fir Frontalieren am Handwierk hei am Land ze halen, sou wéi elo gekuckt gëtt d'Personal aus de Spideeler a Lëtzebuerger Hotelle schlofen ze loossen. D'Hallschent vun de Leit am Handwierk si Frontalieren.

Invité vun der Redaktioun: Romain Schmit


Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.