E Freideg de Moie war de President vum Daachverband vun de Prestatairen, der Copas, eisen Invité vun der Redaktioun.

D'Situatioun am Fleegesecteur ass extrem kritesch a problematesch, de Secteur wier awer  insgesamt gutt opgestallt. Dat sot e Freideg de Moien de President vun der Copas, dem Daachverband vun de Prestatairen vun de Fleege- an Altersheemer Marc Fischbach bei eis am Interview. Et misst ee sech elo op dat Schlëmmst astellen, wat wuel an den nächsten zwou Wochen antriede wäert.

D'Leit wieren all Dag mat neie Problemer an neie Froen konfrontéiert. D'Haaptproblemer sinn engersäits, fir derfir ze suergen, datt déi personell Enkpäss esou vill wéi méiglech limitéiert kënne ginn a fir Schutzmaterial ze kréien. D'Material an den Haiser ass quasi opgebraucht.

An de leschte Stonnen hätt sech awer vill zum Gudden entwéckelt wat d'Schutzmasken ugeet. De Fleegesecteur hätt d'Zouso kritt, fir kënnen op déi national Reserve  vun der Regierung vu Masken zeréckzegräifen. Wéi déi verdeelt ginn, wier haut nach net gekläert.

D'Santé recommandéiert dem Personal vun de soins à domicile elo offiziell, fir sech ze protegéieren. An déi Recommandatioun gëtt och elo vun der Copas ëmgesat. Et hätt een dat ëmmer gewollt, mä bis ewell net d'Moyene gehat. Et misst ee sech awer just bewosst sinn, sou de President vum Daachverband vun de Prestatairen vun de Fleege- an Altersheemer, datt d'Stocken mat ronn 5.000 Soignanten, déi an de Reseauen ënnerwee sinn, ganz séier opgebraucht sinn. Duerfir misst onbedéngt garantéiert sinn, datt neit Material nokënnt.

Den Ament gëtt et och schonn 4 éischt Coronafäll an den Alters- a Fleegeheemer an een Fall vun engem Professionelle vum Fleegepersonal. Natierlech wären d'Leit direkt isoléiert ginn, fir net méi a Kontakt mat Aneren ze sinn, sou de President vun der Copas.

Invité vun der Redaktioun: Marc Fischbach

An Zäite vu Coronavirus gouf den Invité awer via Telefon bäigeschalt a war net am Studio um Kierchbierg.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.