E Donneschdeg de Moie war de CEO vu Luxembourg for Tourism eisen Invité vun der Redaktioun.

Eleng bei den Hotelszëmmere gouf et am Mäerz an am Abrëll e Verloscht vu 16,6 Milliounen Euro am Verglach mam Joer virdrun. Dat seet de Sebastian Reddeker, Generaldirekter vu Luxembourg for Tourism.

Den Tourismus ass den Ament vu ville Facteuren ofhängeg. Facteuren, déi een net onbedéngt an der Hand hätt.

Wéi geet et den eenzele Betriber? Dat wär ganz verschidden.

Deenen enge géif d'Waasser scho bis zum Hals stoen, anerer hätten nach Sputt fir e puer Wochen oder Méint.

Et géif ee mierken, datt Outdoor-Aktivitéiten den Ament éischter gefrot sinn, City-Reese manner.

Wéi d'Vakanz am Summer ausgesäit, ass schwéier soen, ze vill optimistesch däerf een net sinn. Fir d'Branche géif Tourismus heiheem – also wa Lëtzebuerger hei Vakanz maachen – net duer goen. Touristen aus der Groussregioun wären néideg. Sou de Sebastian Reddeker.

LUCI, mat deem Magazine, wat zweemol d'Joer soll erauskommen, an wou déi éischt Editioun elo publizéiert gouf, sollen déi vill schéin Ecker vum Land visibel gemaach ginn. De Magazine gëtt et a 4 Sproochen.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.