E Mëttwoch de Moie war de President vun der Associatioun vun de Veterinären eisen Invité vun der Redaktioun.

D'Veterinäre sinn och wärend dem État de Crise op, fir Urgencen oder wichteg Impfunge gi Clienten empfaangen, dat op Rendez-vous an zäitlech getrennt. An och beim Schluechten an op de Bauerenhäff sinn d'Véidokteren nach ëmmer am Asaz, wéi de President vun der Associatioun vun de Veterinären am RTL-Interview erkläert huet.

De Jean Schoss bedauert awer, datt d'Veterinäre keng Schutzkleedung vun der Santé gestallt krut hätten. Nëmme chirurgesch Masken wiere versprach ginn, wat awer net géif duer goen.

Kaze kéinten de Coronavirus deels kréien, awer net iwwerdroen, mat ganz raren Exceptiounen, erkläert de President vun de Lëtzebuerger Veterinären.

Et kréich een zwar gehollef, ma, den ekonomeschen Impakt vun der Pandemie géifen och d'Véidoktere spieren.
An e puer Méint wäert sech weisen, op se et all packen, sou nach de Jean Schoos.

Ufanks wieren d'Veterinären och bei den Hëllefe fir Independanten vergiess ginn. Mëttlerweil wier dat awer adaptéiert ginn.

Invité vun der Redaktioun: Jean Schoos

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.