E Freideg de Moie war de President vun der CGFP eisen Invité vun der Redaktioun.

Als Chamber vun de Fonctionnairen a Beamten wär een och gäre fir d'Exit-Strategie consultéiert ginn. Mir sinn informéiert ginn, éier et public gouf, mä wierklech geschwat huet kee mat eis, dat bedauert de Roman Wolff, President vun där Kammer an och vun der Staatsbeamtegewerkschaft. Hie war um Freideg de Moien eisen Invité vun der Redaktioun.

Och wat d'Ouverture vun de Schoulen ugeet, hätt een d'Staatsbeamte-Chamber kënne froen. De Romain Wolff sot, et wär net logesch, datt d'Premièren nach misste virun hirem Examen an d'Schoul goen oder de Cycle 1.

Wéi soll dës Kris finanzéiert ginn, a wéi e Bäitrag kënnen d'Staatsbeamte leeschten? Do wär et nach ze fréi driwwer ze schwätzen. An enger Tripartite no der sanitärer Kris kéint sou eppes diskutéiert ginn.

Un enger Steierreform soll jo weider geschafft ginn. Déi soll gerecht ginn. Et soll een d'Suen net an éischter d'Linn bei d'Leit siche goen, mä elo wär e gudden Ament d'FISen - Fongen, déi d'CGFP scho laang kritiséiert - méi héich ze besteieren.

Dëst Joer leeft och de Gehälteraccord an der Fonction Publique aus. Et misst een a Rou kucken, a wann all d'Käschte fir d'Kris um Dësch leien gesinn, wéi eng Fuerderungen ee kéint stellen,  esou de Romain Wolff, President vun der CGFP.

Invité vun der Redaktioun: Romain Wolff

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.