E Freideg de Moie war d'Presidentin vun der nationaler Ethikkommissioun eis Invitée vun der Redaktioun.

Den digitalen, fräiwëllegen, Traçage wier e wichtegen Complemet zu den Efforten vun der Regierung an der perséinlecher Responsabilitéit vun de Leit an der Pandemie, sou d’Julie-Suzanne Bausch, Presidentin vun der nationaler Ethikkommissioun am RTL-Interview um Freideg de Mueren.

Den Traçage wier net onbedéngt elo neidesch, mä éischter fir eng zweet Well oder eng aner Pandemie. Esou kéint een nämlech e weidere Lockdown evitéieren. Dee géif nämlech d'Ekonomie futti maachen.

Och wa Lëtzebuerg de Confinement am Verglach mam Ausland nach gutt iwwerstanen hätt. Wichteg wier, datt een den digitalen Traçage awer elo scho richteg juristesch preparéiert, fir datt en am Noutfall prett ass. An datt een net an der Urgence misst schaffen.

Leit solle sech och onbedéngt op de Covid19 teste goen, sou den Appell vun der Presidentin vun der nationaler Ethikkommissioun. Vill géifen awer fäerten, datt se ënner Quarantän géife gesat ginn. An anerer géife mengen d'Corona-Kris wier schonn eriwwer a géife sech dowéinst net teste loossen.

Wat Zwangshospitalisatiounen ugeet, do ass d'Ethikkommissioun dogéint. Et géif d'Vertrauen an d'Gesondheetswiesen zerstéieren. A wann d'Zwangshospitalisatioune wierklech kéimen, da missten déi Concernéiert och anstänneg Recours-Méiglechkeete kréien, esou nach d’Julie-Suzanne Bausch, Presidentin vun der nationaler Ethikommissioun.

Invité vun der Redaktioun: Julie-Suzanne Bausch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.