Wat mécht de Coronavirus mat de Jonken? Doriwwer hu mir den Donneschdeg de Moie mat der Nathalie Keipes geschwat.

De Confinement war eng belaaschtend Situatioun, en héije Präis deen déi Jonk hu missen bezuelen. Dat sot d'Nathalie Keipes am RTL-Interview um Donneschdeg de Mueren. Si ass Direktesch vum CePAS, e Service, dee Jonker beréit a begleet.

Déi Jonk wiere wärend dem Lockdown doheem agespaart gewiescht an hätten esou keng sozial Kontakter gehat.
Den Austausch mat de Frënn wier awer enorm wichteg bei der Entwécklung vun engem jonken Mënsch. Do hätt et elo e grousse Broch ginn.

Suerge mécht der CePAS-Directrice de staarke Konsum vun Tëlee, Handy a Computer. 35% vun de Jonken hätten enger Etüd no gesot, datt se all Dag permanent erreechbar wieren. Am Confinement wier et zwar eng Alternativ gewiescht, fir a Kontakt mat de Kolleegen ze bleiwen. Et wier awer keen Ersatz fir den physesche Kontakt. Ze vill um Ecran pechen, wier eng Sucht. Hei misst méi Preventioun an Opklärung gemaach ginn an och d'Eltere wieren hei an hirer Virbildfonktioun gefuerdert, sou nach d'Nathalie Keipes vum CePAS.

Invité vun der Redaktioun: Nathalie Keipes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.