E Méindeg de Moie war de President vun der Handwierkerfederatioun eisen Invité vun der Redaktioun.

De President vun der Handwierkerfederatioun begréisst déi nei Hëllefsmesüre vun der Regierung. De Michel Reckinger bleift awer och bei senger Fuerderung: 80% fir all déi, di kuerzschaffen.

„D’Sue musse fléissen, et däerfen net elo 100 Froen hin an hir gestallt ginn“. Sou huet de President vun der Handwierkerfederatioun de Michel Reckinger e Méindeg de Moien op déi nei Hëllefsmesüre reagéiert, déi d’Regierung e Freideg ugekënnegt huet. De Michel Reckinger huet d’Mesurë begréisst, dorënner d’Verlängerung vum Chômage partiel bis Enn Juni. Dee soll awer flexibel bleiwen: Betriber sollen dee kuerzfristeg kënnen ufroen, wann zum Beispill op Eemol eng ganz Rei Salariéë vum Betrib a Quarantän mussen.

De President vun der Handwierkerfederatioun steet iwwregens weiderhin op senger Positioun, datt och Staatsbeamten déi eng Dispens hunn just 80% vun hirer Pai solle kréien. Dat hätt „definitiv näischt mat Näid ze dinn“, sou de Michel Reckinger. D’Staatsbeamtegewerkschaft an den Aarbechtsminister déi d’Fuerderung vun der Handwierkerfederaioun ferm verurteelt haten géinge just weisen, datt se e Problem hätte mat der Debatte iwwert d’Gerechtegkeet. D’Handwierkerfederatioun géing sech net ginn a weiderhin de Statut Unique fir all d’Secteuren fuerderen.

“Wéi ee Spillchen dreift d’Regierung mat Enovos ?“

Esou d'Handwierkerfederatioun um Méindeg de Moien. Viru puer Deeg gouf ee gewuer, datt den Energiegroup Enovos a seng Holding Encevo, déi gréisstendeels dem Staat gehéieren, Minusines opkaf huet, dat nodeems de Group scho Paul Wagner et Fils a Powerpanels opkaaft huet. Fir de Michel Reckinger, de President vun der Handwierkerfederatioun, hätt Enovos elo "d’Boucle zougemeet" a kéint um Marché vun der Stroumliwwerung bis hin zur Installatioun "maache wat se wëll". Et géing ee riskéieren, datt et keng Elektriker méi ginn, ausser Bricoleuren.

De Konkurrenzrot huet 2018 schonn enger Klo vun der Handwierkerfederatioun Recht ginn, mä kéint näischt dogéint maachen. D’Reform vum Konkurrenzrecht, déi um Instanzewee ass, wier dréngend gebraucht. „Mir wëllen net dee Secteur futti gemaach kréien“, esou de Michel Reckinger.

Invité vun der Redaktioun: Michel Reckinger

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.