E Freideg de Moie war den Direkter vum LNS eisen Invité vun der Redaktioun.

Fakt wier, datt d'Infektiounszuelen erofgaange sinn an datt een eng gesellschaftlech Gesamt-Situatioun misst analyséieren. Dat sot den Direkter vum Nationale Gesondheetslaboratoire, de Professer Dokter Friedrich Mühlschlegel. Hie war e Freideg de Moien eisen Invité vun der Redaktioun.

Den LNS géing d'Donnéeë mat liwweren an déi Date géingen hierginn, datt d'Regierung d'Decisioun vum „Lockdown light" kann huelen.

3 Fäll vun der brittescher Corona-Variant goufen et bis ewell hei am Land. De Risk hei ass, datt sech de Virus méi séier ausbreet. D'Roll vum nationale Gesondheetslaboratoire bestéing doranner, fir de Virus a seng Varianten ze bestëmmen. An deem Beräich wiere mer zu Lëtzebuerg par Rapport zum Ausland och ganz gutt opgestallt. Déi südafrikanesch Variant wier bis ewell nach net zu Lëtzebuerg detektéiert ginn, sou de Chef vum LNS.

D'PCR-Tester wieren de gëllene Standard, sou de Mikrobiolog. D'Schnelltester sollten awer och méi an den Asaz kommen. Se wieren eng pragmatesch Léisung, fir vill a séier ze testen. D'Regierung sollt sech all Mëttel ginn, fir d'Pandemie ze bekämpfen. Dowéinst wier de Large Scale Testing och e wichtegen Outil.

Am Drive-in-Testzenter sinn zënter November ronn 12.000 Tester gemaach ginn, mat engem Positivitéitstaux vun 10%. Zesumme mat der Ligue Médico-Sociale gouf och eng Offer geschaaft, fir Kanner ënner 6 Joer ze testen. Hei goufen op e puer Plazen am Land bis ewell ronn 1.000 Kanner getest, 76 vun hinne ware positiv. Si géingen eng grouss Roll bei den Infektioune spillen, well se dacks asymptomatesch wieren, sou de Friedrich Mühlschlegel.

Beim LNS gouf och opgestockt wéinst der Pandemie, d'Ekipp an der Virologie ass vu 7 op 27 Leit gewuess. Déi normal Aktivitéiten am Laboratoire wieren iwwregens net negativ impaktéiert ginn.

Invité vun der Redaktioun - Dr. Friedrich Mühlschlegel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.